ჩავი ბარსელონაში უნიკალური ტექნოლოგიის დანერგვას აპირებს

“ბარსელონას” ახალი მწვრთნელი ჩავი ერნანდესი აპირებს, კატალონიურ გუნდში ახალი ტექნოლოგია დანერგოს, რომელსაც აქამდე ანალოგი არ ჰქონია. საუბარია პროგრამა Kognia-ზე, რომელსაც შეუძლია, თამაშები და ვარჯიშები ტაქტიკურად ავტომატურად გაანალიზოს.

აქამდე არსებული ყველა პროგრამა ტაქტიკურ ანალიზის ადამიანის მიერ შესრულებას მოითხოვდა, Kognia-ს კი შეუძლია ეს თავად გააკეთოს, თამაშების დროს გამოკვეთოს ის არეალები, სადაც გუნდს უპირატესობა აქვს, ან უჭირს, სადაა საჭირო ბალანსის დაცვა, რომელი სივრცეების ათვისება შეიძლება და ა.შ. რაც ძალიან მნიშვნელოვანია, პროგრამა ამას აკეთებს რეალურ დროში, მწვრთნელს შეუძლია მისგან რჩევები მიიღოს შეხვედრის მიმდინარეობისას. საჭირო არაა, ჩავი შესვენებას ან თამაშის დასასრულს დაელოდოს.

პროგრამაზე ჟოან ვილა და მისი შვილი ოსკარი წლების განმავლობაში მუშაობდნენ. ჟოან ვილა “ბარსელონაში” დიდი ხნის განმავლობაში მუშაობდა და მას არაერთი ვარსკვლავის აღზრდაში დიდი წვლილი მიუძღვის, ერთ-ერთი მათგანი კი სწორედ ჩავი ერნანდესია.

ჩავი კომპანია Kognia-ს ერთ-ერთი მეწილეა, რისი წყალობითაც ის ამ პროგრამას “ალ სადში” მუშაობის დროს იყენებდა. პროგრამა გაყიდვაში ცოტა ხნის წინ ჩაეშვა და ერთ-ერთი პირველი, ვინც ის შეიძინა, “ვილიარეალია”. იმავეს აპირებს “ბარსელონა”. პროგრამით ასევე დაინტერესებულია არაერთი ევროპული გრანდი.

ჩავის გარდა Kognia-ს მეწილეები იკერ კასილიასი, პაულუ სოუზა, უნაი ემერი და ვიქტორ ფონტი არიან.

Kognia-ს ოფიციალურ ვებგვერდზე ჩავის რეკომენდაციასაც ვხვდებით: “როგორც მწვრთნელს, Kognia მაწვდის ძალიან მნიშვნელოვან ინფორმაციას, რომელიც საუკეთესო გადაწყვეტილების მიღებაში მეხმარება.”