გულს მტკენს ის ფაქტი, რომ “ბარსელონამ” საკუთარ იდეოლოგიას უღალატა – ხავიერ მასკერანო

კატალონიის “ბარსელონასა” და არგენტინის ნაკრების ლეგენდარული ფეხბურთელი, ხავიერ მასკერანო, რომელმაც ცოტა ხნის წინ საფეხბურთო კარიერა დაასრულა, ყოფილ კლუბზე საუბრობს.

“გულს მტკენს ის ფაქტი, რომ “ბარსა” იმ იდეოლოგიას ღალატობს, რომელმაც გუნდი საუკეთესო გახადა. “ლურჯ-ბროწეულისფერები” ახლა პრიორიტეტად სხვა საკითხებს მიიჩნევენ და ის ფილოსოფია, რომელმაც კლუბი აქამდე მოიყვანა, არ შეინარჩუნეს”, – აცხადებს “ელ ხეფესიტო” The Tactical Room-თან ინტერვიუში.

კატალონიური გრანდის ამჟამინდელი დამრიგებელი, რონალდ კუმანი აღიარებს, რომ თავისი გუნდი აღარ თამაშობს ისეთი სტილით, როგორსაც, მაგალითად, პეპ გვარდიოლასა და ლუის ენრიკეს ხელში გვთავაზობდა. ბევრის აზრით, “ბლაუგრანამ” ამ გზიდან გადახვევა ერნესტო ვალვერდეს მთავარ მწვრთნელად დანიშვნით დაიწყო.

შეგახსენებთ, არგენტინელი “ბარსას” რიგებში 2010-2018 წლებში ასპარეზობდა. ამ დროის განმავლობაში მასკერანომ 334 მატჩი ჩაატარა და თავი 1 გოლით გამოიჩინა (“ოსასუნასთან”). ხავიერმა კატალონიელებთან ერთად 19 ტიტული მოიგო, მათ შორის 2 ჩემპიონთა ლიგა.