ბარსელონას კაპიტნების ხუთეული ცნობილია

სეზონის დაწყების, ლა ლიგის საწყისი სამი ტურის ჩამთავრებისა და ჩემპიონთა ლიგის სტარტის მოახლოების ფონზე, “ბარსელონას” კაპიტნების ჯგუფი საბოლოოდ დაკომპლექტდა. ამ პროცესში გადამწყვეტი როლი მთავარმა მწვრთნელმა, ჰანსი ფლიკმა ითამაშა.

ჟოან გამპერის თასამდე გერმანელმა სპეციალისტმა დროებით კაპიტნებად პირადად დაასახელა რაფინია, პედრი და ერიკ გარსია, საბოლოო კენჭისყრის მოლოდინში. ახლა კი ხუთეულის შერჩევის პროცესი დასრულდა.

ფლიკის გადაწყვეტილება და გუნდის კენჭისყრა

Mundo Deportivo-ს ინფორმაციით, ჰანსი ფლიკმა გადაწყვიტა, რომ რაფინია და პედრი პირველ და მეორე კაპიტნებად საბოლოოდ დარჩენილიყვნენ. ეს სრულიად ლოგიკური ნაბიჯია, თუ გავითვალისწინებთ მათ ავტორიტეტს, ლიდერულ თვისებებს როგორც მოედანზე, ისე გასახდელში. განსაკუთრებით აღსანიშნავია რაფინია, რომელიც გერმანელი მწვრთნელის ყველაზე სანდო მოთამაშეა.

ამის შემდეგ ფლიკმა დანარჩენი სამი კაპიტნის ასარჩევად გუნდში კენჭისყრა ჩაატარა. პარასკევს გამართული გამოკითხვის შედეგად კაპიტნების ხუთეული ასე დაკომპლექტდა:

• პირველი კაპიტანი: რაფინია
• მეორე კაპიტანი: პედრი
• მესამე კაპიტანი: ერიკ გარსია
• მეოთხე კაპიტანი: ფრენკი დე იონგი
• მეხუთე კაპიტანი: ლამინ იამალი

რატომ ეს სამეული?

ერიკ გარსია თანაგუნდელებში განსაკუთრებული პატივისცემით სარგებლობს თავისი დისციპლინისა და თავდადების გამო. ბოლო ორ სეზონში, ფლიკის ნდობის ფონზე, მისი ლიდერული თვისებები საგრძნობლად გაიზარდა და დირექტორთა საბჭოშიც კი ბევრი მას კაპიტნის სამკლაურის იდეალურ კანდიდატად ხედავდა.

ფრენკი დე იონგის არჩევაც ლოგიკური იყო: ნიდერლანდელი უკვე გახლდათ კაპიტნების ჯგუფში, გასახდელში დიდი ავტორიტეტი აქვს და მარკ-ანდრე ტერ შტეგენის წასვლის შემდეგ გუნდში ყველაზე გამოცდილი ფეხბურთელია.

კენჭისყრის მთავარი სიურპრიზი 19 წლის ლამინ იამალის არჩევა გახდა, თუმცა ყველასთვის ნათელია, რომ თავისი უმაღლესი კლასით ის მოედანზე გუნდის უდავო საფეხბურთო ლიდერია.

მოსალოდნელია, რომ ჰანსი ფლიკი კაპიტნების თემას “ვალენსიასთან” მატჩისწინა პრესკონფერენციაზე, თბილისის დროით 15:00 საათზე უფრო დეტალურად შეეხება.