სატრანსფერო ფანჯრის ბოლო დღე – რამდენიმე ტრანსფერის მოლოდინში

დღეს, სატრანსფერო ფანჯრის ბოლო დღეს, “ბარსელონაში”, შესაძლოა, ბევრი რამ მოხდეს. ივარაუდება, რომ ერიკ გარსია და მემფის დეპაი მოვლენ, უსმან დემბელე, სამუელ უმტიტი, ჟან-კლერ ტოდიბო და რაფინია კი წავლენ.

გთავაზობთ ტრანსფერებთან დაკავშირებით გავრცელებულ ბოლო ცნობებს:

მომსვლელები

ერიკ გარსია

• 19 წლის ცენტრალურ მცველს “ბარსელონაში” გადმოსვლა სურს.
• ესპანელი ფეხბურთელის ტრანსფერზე შეთანხმების მიღწევა ადვილი არ იქნება, რადგან “მანჩესტერ სიტი” კატალონიელების ამჟამინდელ 20-მილიონიან შეთავაზებაზე უარს ამბობს.
• გარსიას მოსვლა დამოკიდებულია ჟან-კლერ ტოდიბოზე: თუ ფრანგი მცველი წავა, “ბლაუგრანა” “ქალაქელებს” უკეთეს შეთავაზებას გაუკეთებს.

მემფის დეპაი

• “ლიონის” სპორტულმა დირექტორმა, ჟუნინიომ, გუშინ დაადასტურა, რომ დეპაის “ბლაგრანასთან” შეთანხმება აქვს.
• ნიდერლანდელ ფეხბურთელს ბარსელონაში დღეს ელოდებიან.
• გავრცელებული ინფორმაციით, 26 წლის შემტევის ტრანსფერის განხორციელება რთულია და კატალონიური კლუბიდან წამსვლელ ფეხბურთელებზეა დამოკიდებული.

წამსვლელები

უსმან დემბელე

• 23 წლის ფრანგი შემტევის გაყიდვა მემფის დეპაის “ბარსელონაში” გადმოსვლას წაადგება.
• ვრცელდება ცნობები, რომ ერთადერთი კლუბი, რომელიც დემბელეთი ინტერესდება, “მანჩესტერ იუნაიტედია”.
• ივარაუდება, რომ უახლოეს საათებში “წითელი ეშმაკების” წარმომადგენლები “ბარსელონასთან” მოლაპარაკებებს გამართავენ. კატალონიელებს უსმანის მხოლოდ გაყიდვა სურთ და არა იჯარა.

სამუელ უმტიტი

• თუ დღის ბოლომდე “ბარსელონა” უმტიტის თაობაზე შემოთავაზებას არ მიიღებს, ფრანგი ცენტრალური მცველი დარჩება.
• 26 წლის მოთამაშეთი “რომა”, “რენი”, “ნაპოლი” და “ლიონი” ინტერესდებიან.

ჟან-კლერ ტოდიბო

• 20 წლის ფეხბურთელს “ბარსელონას” დატოვება არ სურს, თუმცა კლუბს მასთან განშორება უნდა.
• ახალგაზრდა უკანახაზელის შეძენის სურვილს “ფულემი” და “დორტმუნდი” გამოთქვამენ.

რაფინია

• “ბარსელონასა” და ბრაზილიელ ნახევარმცელსაც იმედი აქვთ, რომ დღის ბოლომდე შემოთავაზებას მიიღებენ.
• მიუხედავად იმისა, რომ ფეხბურთელს წასვლა სურს და მისი შენარჩუნება არც კლუბს უნდა, რაფინიას დარჩენის შანსი დიდია.