MD: ორი ტური მორიგ რეკორდამდე

მესის სეზონის ბოლომდე, ორი დავალება აქვს შესასრულებელი, მოიგოს ლა ლიგა და გახდეს “პიჩიჩი”. პირველი თითქმის შეუსრულებელი მისიაა, აი მეორე მიზნის მისაღწევად საკმაოდ კარგი შანსი აქვს, რადგან ჩემპიონატს 22 გატანილი გოლით ლიდერობს. ეს მესისთვის ძალიან ცოტა გოლია, თუ წინა სეზონებს გადავხედავთ, მაგრამ მიუხედავად ამისა, მაინც ლიდერია. ცოტა უფრო ძლიერი კონკურენტი რომ ჰყოლოდა, ალბათ მეტსაც შეაგდებდა, ბენზემა კი საშუალებას აძლევს გოლებზე აქტიურად აღარ იფიქროს. ფრანგმა მხოლოდ ბოლო ტურებში მოუმატა და 19 გოლით, მეორე ადგილზეა.

მესის შანსი აქვს მეშვიდე “პიჩიჩი” მოიპოვოს და რეკორდი მოხსნას. ტელმო სარა ექსვჯერ არის საუკეთესო ბომბარდირი გამხდარი, ისევე, როგორც ლიონელ მესი. სულ რაღაც ორი ტურია დარჩენილი იმისათვის, რომ მესი ერთპიროვნული ლიდერი გახდეს.

მესი “ოსასუნას” დაუხვდება სახლში და გასვლაზე შეხვდება “ალავესს”. ხოლო ბენზემა “ვილიარეალს” შეხვდება “ბერნაბეუზე” და სტუმრად “ლეგანსესთან” მოუწევს თამაში.

პაუზის შემდეგ, ქარიმ ბენზემა უფრო შედეგიანია და სწორედ ამის იმედი აქვთ მადრიდელებს, ბენზემას პერსონალურ ფანებთან ერთად. ქარიმი არასდროს გამხდარა საუკეთესო ბომბარდირი, როდესაც მადრიდის “რეალმა” შეიძინა, სწორედ მას მიიჩნევდნენ “ფენომენოს” შემცვლელად, რონალდუს კი უფრო სიღრმიდან ხედავდნენ, მაგრამ ყველაფერი პირიქით მოხდა, მესი-რონალდუს კონკურენციამ ყველა და ყველაფერი შეიწირა.

განსხვავება ის არის, რომ მესი “ფლეიმეიქერია”, ყველა დროის ერთ-ერთი ყველაზე მაგარი მეპასეა და ბომბარდირობასთან ერთად, სხვებსაც აძლევდა თამაშის საშუალებას. აი რონალდუმ ისე მოახდინა მთავარი შემტევის ადგილის ოკუპაცია, რომ ქარიმი მუდმივად მის ჩრდილში იყო, ახლა კი გაიხსნა და მესის მისდევს ტიტულის წასართმევად.

მესის შანსი აქვს ზედიზედ ოთხჯერ მოიგოს “პიჩიჩი”. აქამდე ეს მხოლოდ მადრიდელებს აქვთ გაკეთებული. ალფრედო დი სტეფანოსა (1956-1959) და უგო სანჩესს (1985-1988).