ფლიკი: დეკუსთან 9 ნომრის თაობაზე უნდა ვისაუბროთ

ჰანსი ფლიკი “მარტინეს ვალეროზე” “ელჩესთან” მატჩის შემდეგ იღიმებოდა. ლა ლიგაში უკეთეს დებიუტს ის ვერც ინატრებდა. “ბარსელონამ” ტიტულის დაცვა “ელჩესთან” დამაჯერებელი გამარჯვებით დაიწყო. მიუხედავად იმისა, რომ კატალონიური გუნდი გამოკვეთილი ცენტრალური თავდამსხმელის გარეშე თამაშობდა, მათ გამოსავლის პოვნა მაინც შეძლეს. რაფინიამ და ფერმინმა დუბლები შეასრულეს, ადეიემიმ კი თავი სადებიუტო გოლით გამოიჩინა. თუმცა, შედეგის მიღმა, გერმანელმა სპეციალისტმა პრესკონფერენციაზე რამდენიმე მნიშვნელოვანი მესიჯი გააჟღერა.

მატჩის შეფასება და 9 ნომრის დებატები

ფლიკმა ყურადღება გაამახვილა იმ ასპექტზე, რომელიც მატჩამდე ყველაზე მეტად აწუხებდა:

“ბურთის დაკარგვა მაწუხებდა. ჩვენ ბურთი უნდა გაგვეკონტროლებინა და საბოლოოდ კარი მშრალად შევინახეთ, რაც ფანტასტიკურია, 5 გოლი კი – შესანიშნავი.”

მან “ელჩეს” თამაშიც დადებითად შეაფასა და აღნიშნა, რომ ისინი კარგ ფეხბურთს თამაშობენ, თუმცა “ბარსელონამ” სივრცეები შესანიშნავად გამოიყენა.

ამ უხვგოლიანმა გამარჯვებამ 9 ნომრის დამატების საჭიროების შესახებ დებატები კვლავ გააქტიურა. “ბარსელონამ” კიდევ ერთხელ დაამტკიცა, რომ მოძრავი შემტევი ხაზით საფრთხის შექმნა შეუძლია, მაგრამ ფლიკს ამ პოზიციის გაძლიერებაზე უარი არ უთქვამს: “მომდევნო კვირაში დეკუსთან საუბარი მოგვიწევს და ის უნდა გავაკეთოთ, რაც გუნდისთვის საუკეთესო იქნება.”

რაფინიას კაპიტნობა და ესპარტის მრავალმხრივობა

ამ საღამოს ერთ-ერთი მთავარი გმირი რაფინია იყო. ბრაზილიელმა ორი გოლი გაიტანა და ტრადიციული 9 ნომრის პოზიციაზე არყოფნის მიუხედავად, შეტევაში ლიდერის როლი მოირგო. ფლიკისთვის მისი მნიშვნელობა გატანილ გოლებზე ბევრად შორს მიდის:

“ჩემთვის რაფა ინტენსივობის კარგი მაგალითია. როდესაც ის პრესინგს იწყებს, დანარჩენებიც მიჰყვებიან. ეს არის კაპიტანი. ის კაპიტანია.”

მწვრთნელმა განსაკუთრებული სიტყვებით შეაქო ჩავი ესპარტი, რომელიც სასტარტო თერთმეტეულში ერთ-ერთი ყველაზე მოულოდნელი არჩევანი იყო. მან “ბარსელონას” მარცხენა ფლანგზე ითამაშა (განაცხადს მიღმა დარჩენილი ბალდეს ნაცვლად). ფლიკმა მისი მრავალმხრივობა გამოყო: “მას მარჯვნივაც შეუძლია თამაში და მარცხნივაც. იცის, რა უნდა გააკეთოს და ბურთით ფანტასტიკურია, ყველაფერს კარგად აკეთებს.”

გავის მდგომარეობა და ბალდეს მომავალი

თამაშმა ერთი საზრუნავიც დატოვა: მარჯვენა მუხლში მიღებული დარტყმის გამო გავის მოედნის დატოვება მოუწია. ფლიკმა განმარტა, რომ ტრავმის სირთულის გასაგებად სამედიცინო ტესტების პასუხებს უნდა დაელოდონ, თუმცა დასძინა: “ჩანს, რომ უკეთაა. ვნახავთ.”

რაც შეეხება ალეხანდრო ბალდეს, ფლიკმა უარყო ინფორმაცია, თითქოს ფეხბურთელს კლუბის დატოვება მოსთხოვა. მან აღიარა, რომ დილით ერთმანეთს ესაუბრნენ და ფიქრობს, რომ მოთამაშისთვის ახლა დაფიქრება აუცილებელია:

“მისთვის არ მითქვამს, რომ წასვლა უწევს. მაქვს განცდა და ვფიქრობ, მისთვის უკეთესია იფიქროს, გაანალიზოს, გაერკვეს და შემდეგ ვისაუბრებთ. ამაზე ორივე შევთანხმდით.”