ჩემპიონთა ლიგის გასული სეზონის ერთ-ერთი ყველაზე დიდი სამსაჯო სკანდალი, თუნდაც ირიბად, მაგრამ მაინც გადაწყდა. უეფამ მსაჯებს შეახსენა და ნებისმიერი ეჭვის თავიდან ასაცილებლად განუმარტა, რომ როდესაც ბურთი თამაშშია, მინდვრის მოთამაშის მიერ საკუთარ საჯარიმოში ბურთზე ხელით თამაში პენალტით უნდა დაისაჯოს.
გამოცემა Esport3-მა ამ დირექტივის შესახებ ინფორმაცია გაავრცელა და გაიხსენა 2025/26 წლების სეზონში, ჩემპიონთა ლიგის მეოთხედფინალში “ბარსელონასა” და მადრიდის “ატლეტიკოს” შორის გამართული პირველი მატჩი. აღნიშნულ შეხვედრაში მადრიდელთა მცველმა, მარკ პუბილმა მეკარე ხუან მუსოსგან მიღებული ბურთი საკუთარ საჯარიმოში ხელით გააჩერა.
მსაჯების შეცდომა და მწვრთნელების რეაქცია
დირექტივას პირდაპირ არ უხსენებია 8 აპრილს “სპოტიფაი კამპ ნოუზე” მთავარი არბიტრის, უნგრელი იშტვან კოვაჩისა და VAR-ის ოთახში მყოფი გერმანელი კრისტიან დინგერტის შეცდომა, თუმცა მკაცრად გააფრთხილა მსაჯები, რომ წესის ეს პუნქტი ინტერპრეტაციას არ ექვემდებარება: ეს ცალსახად პენალტია.
იმ ღამით, როცა “ბარსელონა” 0-2 დამარცხდა (საკამათო მომენტისას ანგარიში 0-1 იყო), კატალონიელთა მთავარმა მწვრთნელმა ჰანსი ფლიკმა უკმაყოფილება ღიად გამოხატა:
“სწორედ ასეთი სიტუაციებისთვის გვაქვს VAR! ეს უნდა ყოფილიყო მეორე ყვითელი ბარათი და პენალტი.”
მეორე მხრივ, “ატლეტიკოს” მწვრთნელმა დიეგო სიმეონემ მსაჯის გადაწყვეტილება ასე გაამართლა:
“პენალტი საღი აზრის გამოყენებით არ დაინიშნა.”
ერთგვაროვანი მიდგომა მომავალში
უეფას განმარტების მიზანია, მომავალში მსგავსი ეპიზოდის გამეორების შემთხვევაში, მსაჯებმა პენალტი უყოყმანოდ დანიშნონ. საქმე ისაა, რომ მსგავს ეპიზოდებში წესების გამოყენებისას აქამდე განსხვავებული მიდგომები ფიქსირდებოდა. მაგალითად, 2024/25 წლების სეზონში “ბრიუგესა” და “ასტონ ვილას” მატჩში თერთმეტმეტრიანი დაინიშნა, ხოლო 2024 წლის გაზაფხულზე “არსენალი” – “ბაიერნისა” და მოგვიანებით “სპოტიფაი კამპ ნოუზე” გამართულ “ბარსელონა” – “ატლეტიკოს” მატჩებში ეს ქმედება დაუსჯელი დარჩა.
“ატლეტიკოს” კიდევ ერთი სკანდალი
ეს უკვე ზედიზედ მეორე ზაფხულია, როცა “ატლეტიკო” ჩემპიონთა ლიგის რეზონანსულ სამსაჯო სკანდალში ეხვევა. 2024/25 წლების სეზონის მერვედფინალში, პენალტების სერიაში, რომელმაც გამარჯვებული მადრიდის “რეალის” სასარგებლოდ გამოავლინა, ხულიან ალვარესის გოლი გაუქმდა. მიზეზად თავდამსხმელის მხრიდან ბურთთან “ორმაგი შეხება” დასახელდა.
რამდენიმე თვის შემდეგ უეფამ გადაწყვიტა, რომ მომავალში პენალტების სერიაში მსგავსი ქმედების – უნებლიე ორმაგი შეხებით გატანილი გოლის – დაფიქსირების შემთხვევაში, მსაჯებმა თერთმეტმეტრიანის თავიდან დარტყმა უნდა მოითხოვონ.
ეს არც პირველია და არც უკანასკნელი ბარსას რო არასწორედ მოექცნენ…
თითქოს ლა ლიგაში რო ატლეტიკოს ვჯობდით ამის სამაგიეროდ ლიგაზე ყველაფერი უკან უკან მიდის, რამდენი წელია
აწი რაში გვინდა ამათი აღიარება მაინც არაფერს ცვლის, ახალ სეზონშიც რამე მსგავსი მოხდება ბარსა გამოვარდება და იძახოს მერე უეფამ ბარსა დაჩაგრეს ბარსა დაჩაგრესო.