ფერმინი მხოლოდ კვარაცხელიას ჩამორჩება

ტრავმის გამო ფერმინ ლოპესი 2026 წლის მსოფლიო ჩემპიონატზე ვერ თამაშობს. “ბარსელონას” 23 წლის ნახევარმცველმა ლა ლიგის ბოლო ტურში, “ბეტისის” წინააღმდეგ მარჯვენა ფეხის ტერფის მეხუთე ძვალი მოიტეხა. რომ არა ეს ფაქტი, ის ესპანეთის ნაკრების რიგებში აუცილებლად იქნებოდა.

2022-23 წლების სეზონში “ლინარესში” ნაყოფიერი იჯარის შემდეგ, ფერმინის პროგრესი და სატრანსფერო ღირებულება მუდმივად იზრდება. მიმდინარე სეზონში ჩატარებულ 48 მატჩში გატანილმა 13-მა გოლმა და 17-მა საგოლე გადაცემამ მისი ფასი კიდევ უფრო აწია. Transfermarkt-ის მონაცემებით, კატალონიელთა ვარსკვლავი 100 მილიონ ევროდაა შეფასებული, რითაც ის მსოფლიოში მეორე ყველაზე ძვირადღირებული მოთამაშეა მათ შორის, ვინც მიმდინარე მუნდიალზე არ თამაშობს.

მუნდიალს მიღმა დარჩენილი ტოპ მოთამაშეები

ამ ვირტუალურ რეიტინგში ფერმინს მხოლოდ ერთი ფეხბურთელი უსწრებს და რთული გამოსაცნობი არაა, თუ ვინ იქნება ის.

• ხვიჩა კვარაცხელია (პსჟ) – 140 მილიონი ევრო: 25 წლის ქართველი გარემარბის საქართველოს ნაკრებმა ტურნირის საგზური ვერ მოიპოვა. თუმცა, ჩემპიონთა ლიგის გამარჯვებულ პსჟ-ში ჩატარებული ფანტასტიკური სეზონის (48 მატჩი, 19 გოლი, 11 ასისტი) შემდეგ, მისი ღირებულება რეკორდულ ნიშნულამდე გაიზარდა.
• კოულ პალმერი – 100 მილიონი ევრო: 24 წლის ინგლისელი შემტევი, რომელმაც სეზონში 11 გოლი და 3 ასისტი (34 მატჩში) მიითვალა, ინგლისის ნაკრების განაცხადს მიღმა დარჩა.
• დომინიკ სობოსლაი (“ლივერპული”) – 100 მილიონი ევრო: 25 წლის უნგრელი ნახევარმცველის ეროვნულმა გუნდმა მუნდიალზე კვალიფიკაცია ვერ გაიარა (53 მატჩი, 13 გოლი, 12 ასისტი).
• ბრაიან მბეუმო (“მანჩესტერ იუნაიტედი”) – 75 მილიონი ევრო: 26 წლის კამერუნელი გარემარბის ნაკრები ისტორიული სტატუსის მიუხედავად, მუნდიალზე ვერ მოხვდა. მბეუმომ სეზონში 12 გოლი და 3 ასისტი მიითვალა.
• ვიქტორ ოსიმენი (“გალათასარაი”) – 75 მილიონი ევრო: 27 წლის ნიგერიელი თავდამსხმელი ასევე მუნდიალს მიღმაა საკუთარი ნაკრების წარუმატებლობის გამო, არადა სეზონში 22 გოლი და 8 ასისტი (33 მატჩში) დააგროვა.

მსოფლიოს ტოპ 15-ში

ფერმინი, რომელიც ამჟამად რეაბილიტაციის პროცესს გადის, ზემოთ ჩამოთვლილ ფეხბურთელებს შორის ყველაზე ახალგაზრდაა. მეტიც, ის აბსოლუტურ რეიტინგში (მუნდიალის მონაწილეთა ჩათვლით) მსოფლიოს 15 ყველაზე ძვირადღირებულ მოთამაშეს შორისაა.

მის ასაკში ან მასზე ახალგაზრდებში მხოლოდ რამდენიმე მოთამაშეს აქვს უფრო მაღალი ფასი:

• ლამინ იამალი (“ბარსელონა”, 18 წლის) – 200 მილიონი ევრო.
• პედრი გონსალესი (“ბარსელონა”, 23 წლის) – 150 მილიონი ევრო.
• ჟოაუ ნევეში (პსჟ, 21 წლის) – 140 მილიონი ევრო.
• ჯუდ ბელინგემი (“რეალ მადრიდი”, 22 წლის) – 130 მილიონი ევრო.
• დეზირე დუე (პსჟ, 21 წლის) – 120 მილიონი ევრო.