ესპანეთის თასის ნახევარფინალში გასამართ “ელ კლასიკომდე” უფრო და უფრო ცოტა დრო რჩება. “ბარსელონასა” და “რეალს” ერთმანეთში იმდენჯერ უთამაშიათ, რომ საინტერესო ფაქტები საკმარისზე მეტია. ამჯერად, 15 მათგანზე შევჩერდებით.
- ესპანეთის თასზე, გუნდები ერთმანეთს მეცხრამეტედ უპირისპირდებიან, აქედან მეშვიდედ ნახევარფინალში. წინა 18 დუელიდან, 10-ჯერ “ბარსელონამ” იმარჯვა, ხოლო 8-ჯერ – “რეალმა”.
- გუნდები ფინალში ერთმანეთს 6-ჯერ შეხვდნენ და სამ-სამჯერ მოიგეს. ასეთივე თანაფარდობაა აქამდე გამართულ ექვს ნახევარფინალშიც. 4 დაპირისპირება 1/4-ფინალში გაიმართა (3:2 “ბარსას” სასარგებლოდ), ხოლო 1/8-ფინალში გუნდები ერთმანეთს ერთხელ გადაეყარნენ და “ბარსამ” უკეთესი შედეგი აჩვენა.
- “ბარსამ” “რეალი” თასიდან 7-ჯერ გამოაგდო და აქედან 5-ჯერ ჩემპიონი გახდა. დანარჩენ ორ შემთხვევაში, კატალონიელები ფინალში მარცხდებოდნენ.
- სულ, ესპანეთის თასის ეგიდით, გუნდები ერთმანეთს 31-ჯერ დაუპირისპირდნენ. “ბარსამ” 15-ჯერ მოიგო, “რეალმა” – 10-ჯერ, ხოლო 6 შეხვედრა ფრედ დასრულდა. ბურთების შეფარდება – 63:59, კატალონიელთა სასარგებლოდ.
- მიმდინარე სეზონში, “რეალის” ძირითადი შემადგენლობა ასეთია: კასილიასი, არბელოა, პეპე, რამოსი, კოენტრაუ, ხედირა, ალონსო, იოზილი, დი მარია, რონალდუ, ბენზემა. 30 იანვარს გასამართ შეხვედრაში, აქედან 5 ფეხბურთელი ვერ ითამაშებს. ესენი არიან: კასილიასი, პეპე, რამოსი, დი მარია და კოენტრაუ.
- განმეორებითი მატჩის გამოტოვების საფრთხის წინაშე არიან სესკ ფაბრეგასი, ხავიერ მასკერანო და კრიშტიანუ რონალდუ. თუ მსაჯმა რომელიმე მათგანს ყვითელი ბარათი უჩვენა, ფეხბურთელი დისკვალიფიკაციას მიიღებს.
- ბოლო ექვს თამაშში, “რეალმა” მხოლოდ 1 გოლი გაუშვა და ისიც საჯარიმო დარტყმიდან.
- “ბარსელონას” დაცვის საქმე პირიქითაა – ბოლო 5 თამაშში, კატალონიელებმა 9 ბურთი გაუშვეს.
- ბოლო 5 “ელ კლასიკოდან” “ბარსამ” მხოლოდ 1 მოიგო. დანარჩენი 4 თამაშიდან ორი “რეალმა” მოიგო (ორივე 2:1) და ორიც ფრედ დასრულდა (ორივე 2:2).
- გუნდების საუკეთესო ბომბარდირები მატჩს საუკეთესო ფორმაში ხვდებიან. მიმდინარე წელს ჩატარებულ 6 თამაშში, მესიმ 9 გოლი გაიტანა (2 თერთმეტმეტრიანი), ხოლო რონალდუმ, ასევე 6 თამაშში 10 გოლი (1 თერთმეტმეტრიანი).
- მიმდინარე სეზონში, საკუთარ კედლებში ჩატარებული 17 თამაშიდან “რეალმა” 14 მოიგო და 3 ფრედ დაასრულა.
- “რეალმა” “სანტიაგო ბერნაბეუზე” ბოლოს სწორედ “ბარსელონასთან” წააგო. ერთი წლის წინ, ესპანეთის თასის 1/4-ფინალში, “ბარსამ” მადრიდში 2:1 მოიგო. ბოლო 2 სეზონის განმავლობაში, “რეალი” საკუთარ კედლებში მხოლოდ 2-ჯერ დამარცხდა და ორივეჯერ “ბარსელონასთან”.
- მიმდინარე სეზონში, “ბარსამ” 3 თამაში წააგო და ყველა მათგანი გასვლაზე (“რეალთან”, სუპერთასზე, 1:2. “სელტიკთან”, ჩემპიონთა ლიგაზე, 1:2. “სოსიედადთან”, ლა ლიგაში, 2:3).
- ესპანეთის თასზე, “რეალთან”, “ბარსა” ბოლოს დაახლოებით 2 წლის წინ, ფინალში დამარცხდა. ამ ტურნირზე, კატალონიელებს 15-მატჩიანი წაუგებელი სერია აქვთ.
- “რეალში” მუშაობის 3 სეზონის განმავლობაში, მოურინიო “ბარსელონას” 14-ჯერ დაუპირისპირდა. მას 3 მოგება, 5 ფრე და 6 მარცხი დაუგროვდა. “ბარსას” უპირატესობა აქვს ბურთების შეფარდებაშიც – 28:19.
