ალეხანდრო ბალდე

ალეხანდრო ბალდე არის ესპანელი პროფესიონალი ფეხბურთელი, რომელიც მარცხენა მცველის პოზიციაზე თამაშობს კატალონიურ გრანდში, “ბარსელონაში” და ესპანეთის ეროვნულ ნაკრებში. ის გამოირჩევა ფენომენალური სისწრაფით, დრიბლინგითა და შეტევაში აქტიური ჩართვებით, რითაც თანამედროვე ფლანგის მცველის ეტალონად ყალიბდება.

ადრეული წლები და “ლა მასია”

ალეხანდრო დაიბადა 2003 წლის 18 ოქტომბერს, ბარსელონაში. მამამისი გვინეა-ბისაუდანაა, ხოლო დედა – დომინიკის რესპუბლიკიდან. ფეხბურთის თამაში ადრეულ ასაკში დაიწყო. თავდაპირველად “სანტ გაბრიელის” სკოლაში ირიცხებოდა, შემდეგ კი “ესპანიოლის” აკადემიაში გადავიდა, თუმცა იქ დიდხანს არ გაჩერებულა.

8 წლის ასაკში (2011 წელს) ბალდე “ბარსელონას” სახელგანთქმულ აკადემიას, “ლა მასიას” შეუერთდა. სწორედ აქ გაიარა მან განვითარების ყველა საფეხური. მისი ფიზიკური მონაცემები და ტექნიკური არსენალი თავიდანვე მიანიშნებდა იმაზე, რომ კლუბში დიდებული ტალანტი იზრდებოდა.

ბალდეს ესპანეთის ჩემპიონატი მოგებული აქვს 10-წლამდელთა A, B და C დონის, 12-წლამდელთა A და C დონის, 14-წლამდელთა A და B დონის გუნდებში.

პირველი გუნდი და გარღვევა

პირველ გუნდში მისი ოფიციალური დებიუტი 2021 წლის სექტემბერში, ჩემპიონთა ლიგაზე, მიუნხენის “ბაიერნის” წინააღმდეგ შედგა. მიუხედავად იმისა, რომ პირველი სეზონი ადაპტაციას დაეთმო, ნამდვილი გარღვევა 2022/23 წლების სეზონში მოხდა.

ჩავი ერნანდესის ხელმძღვანელობით, ბალდემ ნელ-ნელა განდევნა ძირითადი შემადგენლობიდან კლუბის ლეგენდა, ჟორდი ალბა და მარცხენა ფლანგის უცვლელი ბატონ-პატრონი გახდა. იმავე სეზონში მან გუნდთან ერთად ლა ლიგა და ესპანეთის სუპერ თასი მოიგო, თავად კი ჩემპიონატის ერთ-ერთ საუკეთესო ახალგაზრდა მოთამაშედ დასახელდა.

სათამაშო სტილი და როლი გუნდში

ბალდეს თამაში იდეალურად ერგება “ბარსელონას” ფილოსოფიას. მისი მთავარი იარაღი ფეთქებადი სისწრაფეა, რაც უპირატესობას აძლევს როგორც შეტევების წამოწყებაში, ისე დაცვაში დროულად დაბრუნებაში. ამასთან, ის შესანიშნავად ფლობს ბურთს და არ ერიდება მეტოქის მოთამაშეების მოტყუებას ერთ-ერთზე დარჩენისას.

სანაკრებო კარიერა

წარმატებული საკლუბო გამოსვლების ფონზე, ბალდემ მალევე მიიღო გამოძახება ესპანეთის ეროვნულ ნაკრებში. მისი დებიუტი პირდაპირ მსოფლიო ჩემპიონატზე, 2022 წელს კატარში შედგა, რაც კიდევ ერთხელ უსვამს ხაზს მის ნიჭსა და მწვრთნელების მხრიდან გამოცხადებულ მაღალ ნდობას.