მენდეში კასადოსა და ბალდეს მათი მომავლის გადასაწყვეტად შეხვდა

მარკ კასადო ჰანსი ფლიკის გეგმებში არ შედის და თავისი მომავალი უნდა გადაწყვიტოს, ალეხანდრო ბალდეს მომავალი კი ჯერ კიდევ გაურკვეველია. მათ ბარსელონაში თავიანთი აგენტი, ჟორჟე მენდეში შეხვდა. როგორც Jijantes იტყობინება, პარასკევს ნაშუადღევს პორტუგალიელმა გამოიყენა შესაძლებლობა და “ბარსელონას” იმ ორ ფეხბურთელთან გამართა შეხვედრები, რომლებსაც თავად წარმოადგენს.

მენდეში ბარსელონაში ხუთშაბათს დილით გაემგზავრა ჟოაუ კანსელუსთან 2029 წლამდე კონტრაქტის გასაფორმებლად და მისი პრეზენტაციისთვის, ნაშუადღევს კი ერთი საათი დეკუსთან ერთად გაატარა.

ბალდეს გაურკვეველი სიტუაცია

კანსელუს დაბრუნებით, რომელმაც გასული სეზონი ძირითად შემადგენლობაში დაასრულა, ბალდეს სიტუაცია ნამდვილად არ არის სახარბიელო. კლუბის აღზრდილი ყოველთვის ამბობდა, რომ “ბარსელონა” მისი პრიორიტეტია, მაგრამ ის ასევე აცნობიერებს, თუ როგორი შეიძლება იყოს მისი ჩვეული როლი. მენდეშმა მას რამდენიმე გუნდის, მათ შორის “მანჩესტერ იუნაიტედის” ინტერესის შესახებ ამცნო და ახლა სწორედ ბალდემ უნდა გადაწყვიტოს, აირჩევს თუ არა სხვაგან თამაშის გამოცდილებას იმ კლუბის მიღმა, რომელშიც 8 წლის ასაკში მოვიდა. მცველს კონტრაქტი 2028 წლამდე აკავშირებს.

კასადოს ევროპული არჩევანი

უფრო ნათელია ის, რომ კასადო ამ სეზონში “ბარსელონაში” არ ითამაშებს. ნახევარმცველს, რომელსაც კონტრაქტი ასევე 2028 წლამდე აქვს და კულე 13 წლიდანაა, საუდის არაბეთში წასვლა არ სურს, სადაც მისთვის “ალ-ჰილალი” და “ალ-აჰლი” იბრძოდნენ. ოჯახის რჩევით, მას ევროპულ ფეხბურთში თამაში ურჩევნია.

“მილანი”, “ნოტინგემ ფორესტი” და “ბენფიკა” იმ კლუბებს შორის არიან (ერთ-ერთ თურქულ კლუბთან ერთად), რომლებიც კასადოს აკვირდებიან. “ბარსელონამ” იცის, რომ არაბეთში ტრანსფერის ჩაშლის გამო 40 მილიონი ევროს მიღება გაუჭირდება. თუმცა, მას შემდეგ, რაც ტომი მარკესი პორტუგალიურ “ბრაგაში” 11+1 მილიონად გაიყიდა, კასადო, რომელსაც პირველ გუნდში 75 მატჩი აქვს ჩატარებული, სულ მცირე 30 მილიონი ღირს და “ბარსელონა” სწორედ ამ თანხის მიღებას იმედოვნებს.