რუნი ბარდჯი: მეტ სათამაშო დროს ვიმსახურებ

შვედი თავდამსხმელი, რომელიც დღეს  მსოფლიო ჩემპიონატზე გასვლისთვის უკრაინის წინააღმდეგ ფლეი-ოფის მატჩს გამართავს, არ მალავს უკმაყოფილებას თავისი როლით “ბარსელონაში”.

20 წლის რუნი ბარდჯიმ შვედეთის ნაკრების შეკრებიდან, ვალენსიაში, სადაც მისი გუნდი უკრაინას დაუპირისპირდება, ინტერვიუ მისცა Sverige Television-ს და გულწრფელად ისაუბრა თავისი მდგომარეობის შესახებ.

“სიმართლე რომ ვთქვა, ამ ეტაპამდე ძალიან ცოტა სათამაშო დრო მივიღე”, – აღნიშნა ახალგაზრდა ფეხბურთელმა, რომელსაც უფრო მეტი დრო სურს, განსაკუთრებით იმის გათვალისწინებით, რამდენად დატვირთულია “ბარსელონას” კალენდარი.
“მაქვს მოთმინება, მაგრამ გულწრფელად ვფიქრობ, რომ უფრო მეტის თამაში მეკუთვნოდა”, – განაცხადა მან.

რუნისთვის კონკურენცია განსაკუთრებით რთულია, რადგან მარჯვენა ფლანგზე მისი მთავარი კონკურენტი ლამინ იამალია.

თავის მდგომარეობაზე საუბრისას ბარდჯი კიდევ უფრო პირდაპირი იყო: “არა, 100%-ით კმაყოფილი არ ვარ, მაგრამ ეს ფეხბურთია”, – თქვა მან.

ამ სეზონში მან ყველა ტურნირზე ჯამში 615 წუთი ითამაშა, გაიტანა 2 გოლი და გააკეთა 4 საგოლე გადაცემა.

მიუხედავად კრიტიკისა, შვედმა ფეხბურთელმა ხაზი გაუსვა, რომ პატივს სცემს როგორც მწვრთნელის გადაწყვეტილებებს, ისე თანაგუნდელებს: “უდიდეს პატივს ვცემ იმ ფეხბურთელებს, რომლებიც აქ უკვე დიდი ხანია, არიან”, – აღნიშნა მან.

ბარდჯის მიმართ ინტერესს არაერთი კლუბი იჩენდა გასულ ზაფხულში, თუმცა მან არჩევანი “ბარსელონაზე” გააკეთა, რადგან ეს მისი ოცნება იყო. ახლა კი კარგად ესმის, რომ უნდა გამოიჩინოს მოთმინება და იმუშაოს იმისთვის, რომ მეტი შანსი მიიღოს.