ბალდეს, კუნდესა და დე იონგის დაბრუნების ვადები

“ბარსელონას” სეზონის გადამწყვეტ ფაზაში ფეხბურთელების დაბრუნება სასიცოცხლოდ სჭირდება – გუნდი იბრძვის როგორც ლა ლიგაში, ისე ჩემპიონთა ლიგაზე. ამ ეტაპზე ჰანსი ფლიკის განკარგულებაში სამი მოთამაშეა, რომლებიც ტრავმის შემდეგ აღდგენით პროცესის ბოლო ეტაპზე არიან: ალეხანდრო ბალდე, ჟიულ კუნდე და ფრენკი დე იონგი.

გერმანელი მწვრთნელისა და კლუბის ექიმების პროგნოზით, სამივე ფეხბურთელი ნაკრებების პაუზის შემდეგ დაბრუნდება, თუმცა მათ შორის ყველაზე სწრაფად მოედანზე დაბრუნებას ბალდე შეძლებს.

ბალდე 3 მარტს, “ატლეტიკოსთან” თასის მატჩში, მარცხენა ბარძაყის ბიცეფსის ტრავმა მიიღო. მაშინ ვარაუდობდნენ, რომ ის დაახლოებით ოთხ კვირას გამოტოვებდა, რაც იმას ნიშნავს, რომ მან შესაძლოა უკვე 4 აპრილს, ისევ “ატლეტიკოსთან” მატჩში ითამაშოს და რეაბილიტაციის ვადაც ზუსტად დაემთხვეს პროგნოზს. 

კუნდეც იმავე შეხვედრაში დაშავდა – მას მარცხენა ბარძაყის ბიცეფსის დაზიანება აქვს. მისი ტრავმის ვადები ოფიციალურად არ დაზუსტებულა, თუმცა ცნობილია, რომ ბალდეზე ცოტა უფრო მეტი დრო დასჭირდება, დაახლოებით ერთი კვირით მეტი. შესაბამისად, მისი დაბრუნება “ატლეტიკოსთან” მატჩისთვის შესაძლებელია, მაგრამ ჯერ არ არის ნათელი, ლა ლიგაში დაბრუნდება თუ ჩემპიონთა ლიგის მეოთხედფინალის პირველ შეხვედრაში.

რაც შეეხება ფრენკი დე იონგს, მან 26 თებერვალს ვარჯიშზე მიიღო მარჯვენა ფეხის ბიცეფსის ტრავმა. მისი გამოჯანმრთელების ვადად 5-6 კვირა სახელდებოდა. მეხუთე კვირა სწორედ “ატლეტიკოსთან” მატჩზე მოდის (4 აპრილს), თუმცა იმის გათვალისწინებით, რომ ნიდერლანდელი ფეხბურთელი რეაბილიტაციას ძალიან ფრთხილად უდგება, არაა გამორიცხული, რომ მისი დაბრუნება კიდევ ერთი კვირით გადაიდოს და ის მოედანზე “ესპანიოლთან” დერბიში ვიხილოთ.