ბარსელონა-ინტერი – ურთიერთშეხვედრების ისტორია

ჩემპიონთა ლიგაზე “ბარსელონას” მომდევნო მეტოქე ცნობილია. ჰანსი ფლიკის გუნდი 1/2-ფინალში იტალიის საუკეთესო გუნდს, “ინტერს” დაუპირისპირდება. “ნერაძური” იტალიის მოქმედი ჩემპიონი და სერია A-ს მიმდინარე გათამაშების ლიდერია.

“ბარსელონასა” და “ინტერის” ურთიერთშეხვედრების ისტორია 16 მატჩს ითვლის და ის სათავეს 1959 წელს იღებს.

გუნდები ერთმანეთს პირველად ბაზრობათა თასის (ამჟამინდელი ევროპა ლიგა) 1959/60 წლების სეზონში, 1/4-ფინალურ ეტაპზე დაუპირისპირდნენ. მაშინ “ბლაუგრანამ” ორივე თამაში მოიგო – შინ 4-0 და სტუმრად 4-2. 

1970 წელს იმავე ტურნირის 1/8-ფინალში უფრო ძლიერი უკვე “ინტერი” გამოდგა. პირველ მატჩში მილანელებმა სტუმრად 2-1 მოიგეს. ეს ერთადერთი შემთხვევაა, როდესაც “ბლაუგრანა” “ნერაძურისთან” საკუთარ კედლებში დამარცხდა. განმეორებითი შეხვედრა 1-1 დასრულდა და მომდევნო ეტაპზე იტალიელები გავიდნენ.

დანარჩენი 12 დაპირისპირება ჩემპიონთა ლიგაზე გაიმართა.

2022/03 წლების სეზონში, ლიგის მე-2 ჯგუფურ ეტაპზე “ბარსამ” “ინტერი” შინ 3-0 გაანადგურა, მილანში კი გუნდებმა უგოლოდ ითამაშეს. ჯგუფიდან ორივე გუნდი გავიდა, “ბარსელონა” კი პირველი ადგილით.

2009/10 წლების სეზონში ესპანურ-იტალიური დაპირისპირება ისევ ჯგუფში შედგა. “ბარსელონა” ამჯერადაც უფრო ძლიერი იყო – სტუმრად 0-0 და შინ 2-0. ჯგუფიდან კვლავ ორივე გუნდი გავიდა, “ბარსა” ისევ პირველი ადგილით.

გუნდები ერთმანეთს იმავე სეზონის ნახევარფინალში შეხვდნენ და ჩემპიონთა ლიგის იმდროინდელი გამარჯვებული ჟოზე მოურინიოს “ინტერთან” ბევრისთვის მოულოდნელად დამარცხდა. სტუმრად 1-3 წაგების შემდეგ პეპ გვარდიოლას “ბარსამ” შინ 1-0 კი მოიგო, მაგრამ ეს ფინალში გასასვლელად საკმარისი არ გამოდგა.

2018/19 წლების სეზონი, ისევ ჯგუფური ეტაპი. ბარსელონაში 2-0, მილანში 1-1 და “ბლაუგრანა” მომდევნო ეტაპზეა, “ნერაძურიმ” კი ევროპა ლიგაზე გადაინაცვლა.

მომდევნო სეზონში გუნდები ლიგის ჯგუფურ ეტაპზე ერთმანეთს კიდევ ერთხელ გადაეყარნენ. “ბარსამ” ორივე თამაში ანგარიშით 2-1 მოიგო, რის შედეგადაც თავად კვლავ პირველი ადგილი დაიკავა, “ინტერი” კი ისევ მესამე პოზიციას დასჯერდა.

აქამდე ბოლო დაპირისპირებები 2022/23 წლების სეზონში გაიმართა და ეს იყო პირველი შემთხვევა, როდესაც “ინტერმა” “ბარსელონას” ჩემპიონთა ლიგის ჯგუფურ ეტაპზე აჯობა. მილანში 0-1 წაგების შემდეგ კატალონიელებმა მეტოქეს საკუთარ კედლებში ვერ სძლიეს (3-3), რის გამოც ევროპა ლიგაზე უკვე თავად გადაინაცვლეს.

სულ გამართულ 16 თამაშში “ბარსელონას” 8 მოგება, 5 ფრე და 3 მარცხი, 27 გატანილი და 15 გაშვებული გოლი დაუგროვდა.

რაც შეეხება ფლეი ოფებს – 3 ორრაუნდიანი დაპირისპირებიდან 2 “ინტერმა” მოიგო, ხოლო ერთი – “ბარსამ”.