ბარსელონელთა დღევანდელი სანაკრებო მონაგარი

დღეს დილით, გამთენიისას, მსოფლიო ჩემპიონატის საკვალიფიკაციო ეტაპზე, მონტევიდეოში ურუგვაიმ ბრაზილიას უმასპინძლა და 2-0 მოუგო. 

ურუგვაელებმა დარვინ ნუნიესისა და ნიკოლას დე ლა კრუსის გოლებით იმარჯვეს და ბრაზილია 2001 წლის შემდეგ პირველად დაამარცხეს.

რონალდ არაუხომ მოედანზე 90 წუთი გაატარა. 

რაც შეეხება სხვა შეხვედრებს: გერმანია ფილადელფიაში მექსიკას დაუპირისპირდა. იულიან ნაგელსმანის გუნდი ანტონიო რიუდიგერის გოლით იგებდა, მაგრამ მალევე ურიელ ანტუნასა და ერიკ სანჩესის გოლებით ჩრდილოეთ ამერიკელები წინ გავიდნენ. საბოლოოდ, 51-ე წუთზე ნიკლას ფიულკრუგმა ანგარიში გაათანაბრა და მატჩი 2-2 დასრულდა. 

ტერ შტეგენმა და ილქაი გიუნდოგანმა მოედანზე 90 წუთი დაჰყვეს.

გუშინ, ევროპის ჩემპიონატის საკვალიფიკაციო ეტაპის მე-8 ტურში დანია სან მარინოს ესტუმრა და 2-1 დაამარცხა. დანიელები რასმუს ჰოილუნდის გოლით იგებდნენ, თუმცა 61-ე წუთზე სენსაციურად სან მარინომაც გაიტანა და ალესანდრო გოლინუჩიმ ანგარიში გაათანაბრა. საბოლოოდ, მათი სიხარული დიდხანს არ გაგრძელდა და იუსუფ პოულსენმა დანიას მოაგებინა. 

ანდრეას კრისტენსენს არ უთამაშია – “ბარსელონას” მცველი სათადარიგოთა სკამზე დარჩა.