პორტუ 0-1 ბარსელონა | ბარსას პორტუგალიიდან 3 ქულა მოაქვს

“ბარსელონამ” ჩემპიონთა ლიგის ჯგუფური ეტაპის მე-2 ტურში სტუმრად “პორტუ” 1-0 დაამარცხა. 

ანგარიში პირველი ტაიმის ბოლოს, კომპენსირებულ დროში გაიხსნა: “ბარსამ” რომარიუ ბარუს შეცდომით ისარგებლა – პორტუგალიელმა ფეხბურთელმა ბურთი ილქაი გიუნდოგანს ჩააბარა, რომელმაც ფერან ტორესი დიოგუ კოშტასთან პირისპირ გაიყვანა, “ზვიგენმა” კი თავისი გუნდი დააწინაურა. 

მეორე ტაიმში კატალონიურმა კლუბმა შეტევაზე უარი თქვა და მთლიანად თავდაცვაზე გადაერთო. ორ ეპიზოდში “ბარსელონა” გოლისგან შესანიშნავი ვარდნებით ჟიულ კუნდემ და რონალდ არაუხომ იხსნეს, რამდენიმე მომენტში კი გუნდი მარკ-ანდრე ტერ შტეგენმა გადაარჩინა.

77-ე წუთზე ჟოაუ კანსელუს მიერ ხელით თამაშის გამო “ბლაუგრანას” კარში პენალტი დაინიშნა, მაგრამ ეპიზოდის VAR-ზე გადამოწმებისას აღმოჩნდა, რომ მანამდე ბურთს ხელით “პორტუს” კანადელი მოთამაშე, სტეფენ ეუსტაკიო შეეხო, რის გამოც ენტონი ტეილორმა თერთმეტმეტრიანი გააუქმა. ამ მომენტიდან 3 წუთში მასპინძელთა ირანელმა ცენტრფორვარდმა, მეჰდი ტარემიმ “ბარსას” მაკრატელა გაუტანა, თუმცა აღნიშნულ მომენტში თამაშგარე მდგომარეობაში იმყოფებოდა.

საბოლოოდ, “ბარსელონამ” “დრაგაოდან” 3 ქულა წამოიღო და 6 ქულით ჯგუფში პირველ ადგილზეა.

“ბარსას” ოქტომბრის სანაკრებო პაუზამდე კიდევ 1 მატჩი ელის – გასვლაზე “გრანადას” წინააღმდეგ. სანაკრებო პაუზის შემდეგ გუნდი “ბილბაოს” უმასპინძლებს, შემდეგ კი ჩემპიონთა ლიგაზე “შახტარს” სახლში დაუპირისპირდება.