მალკომი ალ ჰილალში მიდის – სარგებელს ბარსელონაც ნახავს

საუდის არაბეთში ცნობილი ფეხბურთელების მასიურად შედინებით “ბარსელონაც” იხეირებს, თანაც ისე, რომ კატალონიური კლუბი არცერთ მოთამაშეს არ შეელევა.

Relevo-ს ჟურნალისტის, მატეო მორეტოს ინფორმაციით “ზენიტის” ბრაზილიელი ფეხბურთელი, მალკომი “ალ ჰილალში” გადასვლასთან ძალიან ახლოსაა. თუ ტრანსფერი შედგა, რისი შანსიც ძალიან დიდია, სარგებელს “ბარსაც” ნახავს.

მალკომი “ბარსელონაში” 2018 წელს “ბორდოდან” 41 მილიონ ევროდ გადმოვიდა, ერთი წლის შემდეგ კი ის “ზენიტში” 40 მილიონად გადავიდა. ცნობილია, რომ კატალონიელებმა ფეხბურთელის მომდევნო ტრანსფერიდან 7.5%-ის მიღების უფლება დაიტოვეს. ეს ნიშნავს, რომ რა თანხაზეც “ზენიტი” და “ალ ჰილალი” შეთანხმდებიან, იმის 7.5% “ბლაუგრანას” შეხვდება.

ამჟამად მალკომი Transfermarkt-ზე 30 მილიონ ევროდაა შეფასებული. თუ არაბები მასში საბაზრო ფასის ნახევარს მაინც გადაიხდიან, მაშინ “ბარსას” მილიონ ევროზე მეტი შეხვდება. თანხა დიდი არაა, მაგრამ ეს შემოსავალი წლიურ ბიუჯეტში გათვალისწინებული არაა და მისი მიღება კლუბს კარგად დაეხმარება.