ვიქტორ ბარბერა – ფეხბურთელი, რომელსაც ლა მასიას ნავსის გატეხა შეუძლია

“ბარსელონას” აკადემია მსოფლიოში ერთ-ერთი საუკეთესოა და მას ამბიცია აქვს, რომ სულაც საუკეთესოა.

21-ე საუკუნეში “ლა მასიამ” მსოფლიო ფეხბურთს ბევრი ვარსკვლავი აჩუქა. ყველა პოზიციაზე შეგვიძლია გავიხსენოთ მაღალი დონის ფეხბურთელები, ერთის გარდა.

“ლა მასიას” ცენტრფორვარდებში უჭირს. პირველ გუნდამდე მიღწევა ბოიან კრკიჩმა, მუნირ ელ ჰადადიმ და სანდრო რამირესმა მოახერხეს, მაგრამ საბოლოოდ იმედები ვერცერთმა გაამართლა.

ამჯერად “ლა მასიადან” ტალანტების ახალი თაობა მოდის. გავი, ფატი და ბალდე უკვე პირველ გუნდში არიან, რიგში კი რამდენიმე ფეხბურთელია. ერთ-ერთი მათგანია ცენტრფორვარდი ვიქტორ ბარბერა, რომელიც გავიზე 2 კვირით უმცროსია.

ბარბერა “ბარსას” აკადემიას 2020 წელს შეუერთდა და პირველივე სეზონში 19-წლამდელთა ჩემპიონატის საუკეთესო ბომბარდირი გახდა. ახალგაზრდულ ჩემპიონთა ლიგაზე ვიქტორმა 10 შეხვედრა ჩაატარა და 8 გოლი გაიტანა, აქედან 4 მატჩი და 6 გოლი მიმდინარე სეზონზე მოდის. ბარბერა ტურნირის საუკეთესო ბომბარდირთა შორისაა. ახალგაზრდა ფეხბურთელს პერიოდულად “ბარსა ატლეტიკის” შემადგენლობაშიც ვხედავთ ხოლმე. წინა ტურში ის სასტარტოში პირველად გამოჩნდა და გოლიც გაიტანა. სულ რაფა მარკესის გუნდში 165 წუთი ითამაშა და  თავი 2-ჯერ გამოიჩინა.

ვიქტორ ბარბერა იძლევა იმედს, რომ “ლა მასია” ბოლოს და ბოლოს მაღალი დონის ცენტრფორვარდს გაზრდის. თუმცა ამ ცენტრფორვარდის შესანარჩუნებლად “ბარსას” ბრძოლა მოუწევს, რადგან ფეხბურთელს კონტრაქტი მიმდინარე სეზონის ბოლოს უმთავრდება.