სევილია-ბარსელონა | მატჩისწინა მიმოხილვა

“ბარსელონა” ახალ სეზონს მარტივი საშინაო და რთული გასვლითი თამაშებით იწყებს. “სოსიედადთან” სტუმრად თამაშის შემდეგ “სევილიას” ჯერია, რომელსაც დღეს “სანჩეს პისხუანზე” დავუპირისპირდებით.

სათამაშო ფორმა

მასპინძელ გუნდზე კარგს ვერაფერს ვიტყვით. 3 თამაშში 2 მარცხი და მხოლოდ 1 ქულა. თანაც ლოპეტეგის გუნდს სერიოზული მეტოქე ჯერ არ ჰყოლია.

ანდალუსიურ გუნდს ლა ლიგის ბოლო 4 საშინაო თამაშში წაგება არ აქვს, მაგრამ სევილიელებმა ამ 4 დაპირისპირებიდან მხოლოდ ერთი მოიგეს. ლა ლიგის გასულ გათამაშებაში კი “სევილია” ამ მოედანზე მხოლოდ ერთხელ დამარცხდა.

“ბარსამ” ლა ლიგა “რაიოსთან” შინ ქულების დაკარგვით დაიწყო, მაგრამ შემდეგ კატალონიელებმა ზედიზედ 2 შეხვედრა მარტივად მოიგეს.

გუნდის სათავეში ჩავის მოსვლის შემდეგ “ბლაუგრანას” ლა ლიგის გასვლით შეხვედრაში წაგება არ აქვს – 15 მატჩში 10 მოგება და 5 ფრე.

ტრანსფერები

“ბარსელონას” სატრანსფერო აქტივობებზე ყველამ ყველაფერი ვიცით. ბოლო თამაშის შემდეგ გუნდმა განაპირა მცველები, ექტორ ბელერინი და მარკოს ალონსო დაიმატა, მაგრამ ისინი განაცხადში ვერ მოხვდნენ. გუნდი დატოვა სერჟინიო დესტმა, რომელსაც ჩავი ისედაც არაფერში იყენებდა.

აქტიური ზაფხული ჰქონდა “სევილიასაც”. ანდალუსიელებმა ისკო, მარკაო, ალექს ტელესი და ტანგი ნიანზუ დაიმატეს, ჟიულ კუნდე, დიეგო კარლოსი და ლუდვიგ აუგუსტინსონი კი გაუშვეს. თუმცა საწყის 3 ტურში მიხვდნენ, რომ ცვლილებები კიდევ საჭირო იყო და ბოლო თამაშის შემდეგ ადნან იანუზაი და კარსპერ დოლბერგი დაიმატეს, ხოლო მუნირ ელ ჰადადი და ლუკას ოკამპოსი გაუშვეს.

დანაკლისი

მასპინძლებს რეკიკი, კორონა, იანუზაი და მარკაო არ ეყოლებათ. სტუმრები კი ახალწვეული განაპირა მცველების, ბელერინისა და ალონსოს გარეშე ითამაშებენ.

ურთიერთშეხვედრები

ამ გუნდებს ერთმანეთთან აქამდე 196-ჯერ უთამაშიათ. “ბარსელონას” 112 მოგება, 39 ფრე და 45 მარცხი, 406 გატანილი და 241 გაშვებული გოლი დაუგროვდა.

ამ გუნდების ბოლო 32 დაპირისპირებაში “სევილიას” მხოლოდ 3 მოგება აქვს. ამ სტატისტიკაში შედის თამაშები პეპ გვარდიოლას მწვრთნელობიდან მოყოლებული.

“ბარსელონას” “სევილიასთან” 4-მატჩიანი წაუგებელი სერია აქვს, საიდანაც 3 კატალონიელებმა მოიგეს. ბოლო 10 შეხვედრაში ანდალუსიელებმა მხოლოდ ერთხელ იმარჯვეს.

მეტოქის მოედანზე გამართულ 95 შეხვედრაში “ბლაუგრანას” 33 მოგება, 26 ფრე და 36 მარცხი დაუგროვდა.

“სანჩეს პისხუანზე” გამართული ბოლო 4 მატჩიდან გუნდებმა თითო მოიგეს, 2 კი ფრედ დასრულდა.

გამორჩეული ფეხბურთელები

თამაში განსაკუთრებული რამდენიმე ფეხბურთელისთვის იქნება. უპირველესად კი ჟიულ კუნდე უნდა ვახსენოთ.

ფრანგი ცენტრალური მცველი წინა 3 სეზონის განმავლობაში სწორედ “სევილიაში” თამაშობდა და ამ გუნდის მაისური 133-ჯერ მოირგო.

“სევილიასა” და “ბარსელონას” შორის წინა სეზონში “სანჩეს პისხუანზე” გამართულ შეხვედრაში კუნდემ თავი წითელი ბარათით გამოიჩინა.

მეტოქე გუნდში თამაშის გამოცდილება “სევილიას” ფეხბურთელსაც აქვს. საუბარი, რა თქმა უნდა, ივან რაკიტიჩზე გვაქვს. “ბარსელონაში” გატარებული 6 სეზონის განმავლობაში ხორვატმა ნახევარმცველმა მონაწილეობა 310 შეხვედრაში მიიღო, 35 გოლი გაიტანა, 42 შედეგიანი გადაცემა გააკეთა და 13 ტიტული მოიგო.

დღევანდელი მეტოქე განსაკუთრებულია “ბარსელონას” ახალი ლიდერისთვის, რობერტ ლევანდოვსკისთვისაც. პოლონელს “სევილიას” წინააღმდეგ ჩატარებულ 5 მატჩში გოლი არ აქვს გატანილი, რაც მის კარიერაში ყველაზე ცუდი შედეგია.

არბიტრი

ტურის ცენტრალურ დაპირისპირებას 45 წლის ანტონიო მატეუ ლაოსი განსჯის.

ლაოსმა მსაჯობა 1999 წელს დაიწყო, 2002 წელს მე-3 დივიზიონში დაწინაურდა, 2 წლის შემდეგ მეორეში, ხოლო 2008 წლიდან პრიმერაში მსაჯობს. 2011 წლიდან ლაოსი FIFA-ს არბიტრია. Marca-მ ლა ლიგის საუკეთესო მსაჯად ის 2-ჯერ, 2010/11 და 2013/14 წლების სეზონებში დაასახელა.

მატეუ ლაოსის კარიერაში მთავარი მოვლენა 2021 წელს “მანჩესტერ სიტისა” და “ჩელსის” შორის გამართული ჩემპიონთა ლიგის ფინალის მსაჯობა იყო.

კარიერის განმავლობაში ლაოსი თამაშში საშუალოდ 24.6 ჯარიმასა და 0.29 თერთმეტმეტრიანს ნიშნავს, ფეხბურთელებს კი 4.6 ყვითელ და 0.2 წითელ ბარათს უჩვენებს.

ანტონიო მატეო ლაოსის სტატისტიკა “სევილიასა” და “ბარსელონას” თამაშებში:

სტატისტიკა

• ამ გუნდების ბოლო 35 დაპირისპირებაში “სევილიას” მხოლოდ 3 მოგება აქვს და სამივე “სანჩეს პისხუანზე”;
• ამ გუნდების ბოლო 8 თამაშიდან “სევილიამ” ერთზე მეტი გოლის გატანა მხოლოდ ერთხელ მოახერხა, 5-ჯერ კი მეტოქის კარი საერთოდ ვერ აიღო;
• “ბარსელონას” ლა ლიგის ბოლო 16 გასვლით შეხვედრაში წაგება არ აქვს;
• “სევილიას” ლა ლიგის ბოლო 21 საშინაო თამაშში მხოლოდ 1 წაგება აქვს;
• მიმდინარე სეზონში გამართულ 3 მატჩში “სევილიას” მოგება არ აქვს;
• “სევილიას” ბოლო 4 საშინაო შეხვედრაში 2 ან ნაკლები გოლი გადიოდა;
• ამ გუნდების ბოლო 5 თამაშიდან ოთხში მსაჯები 5 ან მეტ ბარათს აჩვენებდნენ;
• ამ გუნდების ბოლო 4 თამაშში “სევილია” კარის მშრალად შენახვას ვერ ახერხებდა;
• რობერტ ლევანდოვსკის “სევილიას” წინააღმდეგ გამართულ 5 თამაშში ჯერ გოლი არ აქვს გატანილი;
• ლა ლიგის პირველ 3 ტურში “სევილიას” ბურთის ფლობის საშუალო მაჩვენებელი 65.2% არის, რაც საუკეთესო შედეგია. მეორე ადგილზე “ბარსელონაა”;
• “სევილიასთან” გამართულ ბოლო 5 თამაშში უსმან დემბელე ან გოლის გატანას ახერხებდა, ან საგოლე გადაცემის გაკეთებას;
• ტოტალიზატორები “ბარსელონას” მოგებას კოეფიციენტს 1.7 ანიჭებენ, რაც მოგების 59%-იან შანსს უდრის, თუმცა “ბარსა” ასეთი თამაშების მხოლოდ 47%-ს იგებს.

ჩავი მატჩის წინ

ჩავის კომენტარი სრულად

სავარაუდო შემადგენლობები

Sport

სევილია (4-3-3): ბონო, ნავასი, გუდელი, ნიანზუ, აკუნია, ფერნანდო, ხორდანი, დელანეი, ლამელა, რაფა მირი, პაპუ გომესი.

ბარსელონა (4-3-3): ტერ შტეგენი, კუნდე, არაუხო, გარსია, ბალდე, ბუსკეტსი, დე იონგი, პედრი, რაფინია, ლევანდოვსკი, დემბელე.

Mundo Deportivo

სევილია (4-3-3): ბონო, მონტიელი, ნიანზუ, გუდელი, აკუნია, ფერნანდო, ხორდანი, პაპუ გომესი, ტორესი, რაფა მირი, ისკო.

ბარსელონა (4-3-3): ტერ შტეგენი, კუნდე, არაუხო, გარსია, ალბა, ბუსკეტსი, დე იონგი, პედრი, რაფინია, ლევანდოვსკი, დემბელე.

Marca

სევილია (4-3-3): ბონო, მონტიელი, ანხელი, ნიანზუ, აკუნია, ხორდანი, ფერნანდო, დელანეი, ლამელა, რაფა მირი, პაპუ გომესი.

ბარსელონა (4-3-3): ტერ შტეგენი, კუნდე, არაუხო, კრისტენსენი, ბალდე, ბუსკეტსი, პედრი, გავი, დემბელე, ლევანდოვსკი, ტორესი.

AS

სევილია (5-3-2): ბონო, ნავასი, ნიანზუ, ფერნანდო, გუდელი, აკუნია, დელანეი, ხორდანი, რაკიტიჩი, რაფა მირი, პაპუ გომესი.

ბარსელონა (3-4-3): ტერ შტეგენი, არაუხო, კუნდე, გარსია, ბუსკეტსი, პედრი, გავი, ბალდე, დემბელე, ლევანდოვსკი, რაფინია.

პროგნოზი

• WhoScored: 1-4
• Sportsmole: 1-3
• Sportskeeda: 1-3
• 90min: 0-2
• Squawka: 2-1