ჩავი ერნანდესი სევილიასთან მატჩის წინ

ხვალინდელი მატჩი კიდევ ერთი ფინალია. ანდალუსიელთა დამარცხებით მე-2 ადგილზე გადასვლისა და საკუთარი ძალების კიდევ ერთხელ დამტკიცების შესაძლებლობა გვექნება. ნებისმიერი მეტოქის წინააღმდეგ ბრძოლა შეგვიძლია.

გულშემატკივართა მხარდაჭერა ძალიან გვჭირდება.

რა თქმა უნდა, ვნახავთ, ვიგოში (სელტა-რეალი) რა მოხდება, მაგრამ, ჩვენ საკუთარ თავზე ფოკუსირება გვმართებს. მეორე ადგილზე გადასვლა ჩვენს ხელშია.

ისე უნდა ვითამაშოთ, როგორც “ბერნაბეუზე” 60-70 წუთის განმავლობაში ვაჩვენეთ. ჩვენი გზა გვაქვს, რომელსაც აუცილებლად უნდა მივყვეთ, წინააღმდეგ შემთხვევაში, კარგი არაფერი მოხდება.

მთავარი მიზანი, მომავალ სეზონში ჩემპიონთა ლიგაზე ასპარეზობაა. ნოემბერში ძალიან რთული სიტუაცია გვქონდა. ახლა კი, ჩვენი გეგმა, ლა ლიგაში რაც შეიძლება მაღალი პოზიციის დაკავება და ევროპა ლიგის მოგებაა.

გვსურს, საქმე ასეთი ძალისხმევით გავაგრძელოთ. იმის გათვალისწინებით, რასაც სავარჯიშო სესიებზე ვხედავ, ძალიან ოპტიმისტურად ვარ განწყობილი – ფეხბურთელები ენთუზიაზმით აღსავსენი და დიდი მიზნებისთვის ბრძოლის წყურვილით არიან შეპყრობილი. მომავალ თვენახევარში ყველაფრისთვის ვიბრძოლებთ.

ტრანსფერებზე საუბარს არ ვაპირებ. ამ სეზონში ბევრი რამ სასწორზე დევს, ასე რომ, მატჩების გარდა არაფერზე ვსაუბრობთ. მართალია, რომ კლუბი ახალწვეულების მოყვანაზე მუშაობს, მაგრამ კონკრეტულ მოთამაშეებს არ დავასახელებ.

ანსუ ფატის დაბრუნება დიდი ემოციებითა და შესანიშნავი ვარჯიშით აღინიშნა. ვხედავ, რომ ის ბედნიერია და გუნდის რიტმს კარგად მიჰყვება.

აქ მშვიდი დღეები არ არსებობს, რადგან ეს “ბარსაა”, სადაც მშვიდი დაძაბულობა სუფევს, მაგრამ, ვიცი სადაც ვარ და ეს მომწონს.

პიკე მსოფლიო ჩემპიონატზე ითამაშებს? ეს ლუის ენრიკეს უნდა ჰკითხოთ. როგორც მწვრთნელი, რომელსაც დიდი არჩევანი აქვს, ჟერარით კმაყოფილი ვარ – ის ძალიან მაღალ დონეზე ასპარეზობს. 

La Xavineta (Xaviball)? დიახ, სახალისოა. იუმორის გრძნობა მაქვს, რის გამოც ეს მომეწონა. თუ ხუმრობა პოზიტიურია, უნდა მივიღოთ, მაგრამ, პატივისცემის ფარგლებში.

როტაციას მივმართავთ. ბევრი მნიშვნელოვანი ფეხბურთელი გვყავს, რაც ძალიან კარგი ფაქტია.

ბევრი მოთამაშე მეტ შანსს იმსახურებს, რადგან ისინი ვარჯიშებზე მაქსიმალურად იხარჯებიან. ამასთან, გასვლითი მატჩების გვიწევს და, შესაძლოა, ტრავმიანობამ იმატოს. ამიტომ, როტაცია აუცილებელია.

დემბელე ძალიან ბედნიერი და გუნდის პროექტში ჩართულია. ყველაფერი მასა და კლუბზეა დამოკიდებული. უსმანი ძალიან მაღალი დონის ფეხბურთელია. ფრანგს მატჩის ბედის გადაწყვეტა შეუძლია და, შესაძლოა, თავის პოზიციაზე მსოფლიოში საუკეთესოც კია.

ქალთა ფეხბურთი განსხვავებულია – ფიზიკურ ასპექტში ბევრი სხვაობა შეინიშნება, მაგრამ გოგოების ყურებით სიამოვნება მივიღე. მათი თამაში მომწონს და აშკარაა, რომ ქალთა გუნდი “ბარსელონას” ფილოსოფიას ინარჩუნებს.

გავი და არაუხო კლუბის მომავლისთვის უმნიშვნელოვანესი მოთამაშეები არიან – “ბარსას” მათი გაშვების უფლება არ აქვს. ამ საკითხს დადებითად ვუყურებ და ვიმედოვნებ, რომ ისინი კონტრაქტებს გაახანგრძლივებენ.

ბუსკეტსს ვუყურებ და ვხედავ, რომ მას მაღალ დონეზე თამაში კიდევ დიდხანს შეუძლია. როცა სერხიო ხელმისაწვდომი არაა, საყრდენად თამაშის შესაძლებლობა ფრენკისა და ნიკოს აქვთ, თუმცა, მათ უფრო შემტევი ტიპის ფეხბურთელებად მივიჩნევ. ამ მომენტისთვის, ბუსი შეუცვლელი ფიგურა და ფუნდამენტალური მოთამაშეა.

გოგოების “კლასიკოზე” შესანიშნავი ატმოსფერო იყო, რაც მათ დაიმსახურეს. იმედი მაქვს, ხვალაც მსგავსი ვითარება იქნება. 

ფრენკისა და არაუხოს დისკვალიფიკაციამდე 1 ბარათი აშორებთ? მომავალ მატჩებზე ფოკუსირებულნი ვართ, დრო კარგად უნდა გამოვიყენოთ. ამაზე დიდად არ ვღელავ.

რიუდიგერი? როგორც ვთქვი, ამ თემაზე არ ვსაუბრობ. ტრანსფერებზე მატეუ ალემანი და ჟორდი კრუიფი მუშაობენ. ჩვენ ხვალინდელ მატჩზე ვფიქრობთ.