ჩელსი და ბარსელონა დე იონგის ტრანსფერზე მოლაპარაკებებს იწყებენ

ფრენკი დე იონგის მომავალი ისევ გაურკვეველია. აგვისტო დაიწყო და ჯერ არ ვიცით, დარჩება თუ არა ნიდერლანდელი “ბარსელონაში”.

კატალონიურ გუნდს 25 წლის შუახაზელის გაყიდვა უნდა, რასაც როგორც ეკონომიკური, ასევე სპორტული მიზეზები აქვს. დე იონგი გუნდის ყველაზე მაღალანაზღაურებადი ფეხბურთელია და მისი ხელფასი კლუბის ახალ სახელფასო პოლიტიკაში ვერ ჯდება, ფეხბურთელს კი გასამრჯელოს შემცირება არ სურს. რაც შეეხება სპორტულ მიზეზს – ჩავის ურჩევნია, დე იონგის ნაცვლად გუნდში ბერნარდუ სილვა ჰყავდეს, პორტუგალიელის ტრანსფერი კი სწორედ დე იონგზეა დამოკიდებული.

აქამდე დე იონგის შეძენით ყველაზე აქტიურად “მანჩესტერ იუნაიტედი” იყო დაინტერესებული, მაგრამ ფრენკი “წითელ ეშმაკებში” თამაშზე ჯიუტად უარს აცხადებს. მიზეზი ისაა, რომ მანჩესტერული გუნდი ჩემპიონთა ლიგაზე ვერ მოხვდა.

რამდენიმე კვირის წინ ბარსელონაში იმყოფებოდა “ჩელსის” ახალი მფლობელი ტოდ ბოელი, რომელიც ჟოან ლაპორტას, მატეუ ალემანისა და ჟორდი კრუიფს შეხვდა. შეხვედრის დროს დე იონგის საკითხიც განიხილეს, მაგრამ არაფორმალურად.

Sport-ის ცნობით ცოტა ხნის წინ “ჩელსიმ” “ბარსას” ნიდერლანდელის ტრანსფერზე ოფიციალური წინადადებით მიმართა. “ბარსელონას” ფეხბურთელის სანაცვლოდ მინიმუმ 80 მილიონი ევროს მიღება სურს. ცნობილია, რომ ტოდ ბოელი მოთამაშეების გაცვლის დიდი მოყვარულია და ლონდონურ კლუბს უნდა, ტრანსფერში სესარ ასპილიკუეტა და მარკოს ალონსო ჩართოს. “ბარსა” ამ ორი ესპანელით დაინტერესებულია, მაგრამ კატალონიელებს სურთ, რომ ტრანსფერები ერთმანეთისგან განცალკევებით განხორციელდეს.

ცნობილია, რომ ფრენკი დე იონგის პრიორიტეტი “ბარსელონაში” დარჩენაა, რადგან ფრენკის ქალაქიც მოსწონს და კატალონიელთა ახალი სპორტული პროექტიც. თუმცა მაინც არის შანსი, ის ჩემპიონთა ლიგაზე მოთამაშე გუნდში გადასვლას დასთანხმდეს, “ჩელსი” კი სწორედ ასეთი გუნდია.