“ბარსელონას” ახალგაზრდა ფეხბურთელებმა და კლუბის პრეზიდენტმა საერთაშორისო აღიარება მოიპოვეს. 9 ნოემბერს იტალიურმა გამოცემა Tuttosport-მა Golden Boy 2026-ის გამარჯვებულები გამოაცხადა. დაჯილდოებულთა შორის კატალონიური კლუბის სამი წარმომადგენელია: პაუ კუბარსი, ჯულია გალი და ჟოან ლაპორტა.
კუბარსი 2026 წლის საუკეთესო ახალგაზრდა ფეხბურთელია
19 წლის პაუ კუბარსიმ Golden Boy 2026 მოიგო. ეს პრესტიჟული ჯილდო ყოველწლიურად ევროპის ჩემპიონატებში მოასპარეზე 21 წლამდე ასაკის საუკეთესო ფეხბურთელს გადაეცემა.
“ბარსელონას” ცენტრალური მცველისთვის 2026 წელი განსაკუთრებით წარმატებული გამოდგა. მან კატალონიურ კლუბთან ერთად ესპანეთის ჩემპიონატი და სუპერ თასი მოიგო, ხოლო ესპანეთის ნაკრებთან ერთად მსოფლიო ჩემპიონი გახდა. გარდა ამისა, კუბარსი მსოფლიო ჩემპიონატის საუკეთესო ახალგაზრდა ფეხბურთელადაც დასახელდა.
კუბარსი “ბარსელონას” ისტორიაში მეხუთე ფეხბურთელია, რომელმაც Golden Boy მოიგო. მანამდე ეს ჯილდო ლიონელ მესიმ (2005), პედრიმ (2021), გავიმ (2022) და ლამინ იამალმა (2024) მიიღეს.
ჯულია გალისა და ჟოან ლაპორტას აღიარება
Tuttosport-მა “ბარსელონას” ქალთა სარეზერვო გუნდის ფეხბურთელი ჯულია გალი Best Italian Golden Girl-ის ჯილდოთი გამოარჩია. ეს პრიზი საუკეთესო ახალგაზრდა იტალიელ ფეხბურთელ ქალს გადაეცემა და გალის ბოლო ერთი წლის განმავლობაში მიღწეულ პროგრესს უსვამს ხაზს.
აღიარება ერგო “ბარსელონას” პრეზიდენტ ჟოან ლაპორტასაც, რომელიც წლის საუკეთესო პრეზიდენტად დასახელდა.
Golden Boy 2026-ის დაჯილდოების ოფიციალური ცერემონია 14 დეკემბერს, იტალიის ქალაქ ტურინში გაიმართება, სადაც გამარჯვებულებს პრიზები გადაეცემათ.
forum კომენტარები (0)