სუპერკომპიუტერი: ლა ლიგაში ფავორიტი რეალია

სუპერკომპიუტერად წოდებულმა FiveThirtyEight-მა 2022/23 წლების სეზონის პროგნოზები გამოაქვეყნა.

ჩვენი ინტერესის სფერო, რა თქმა უნდა, ლა ლიგაა. სუპერკომპიუტერი ამ სეზონში საუკეთესო ესპანურ გუნდად “რეალს” მიიჩნევს, რაც გასაკვირი არაა, რადგან მადრიდელები მოქმედი ჩემპიონები არიან. FiveThirtyEight-ს აზრით “რეალს” ლა ლიგის მოგების 39%-იანი შანსი აქვს, “ბარსელონას” კი 25%-იანი.

ევროპის წამყვან 5 ჩემპიონატში პროგნოზში ასეთი მცირე სხვაობა სხვაგან არსადაა. ინგლისშიც კი “მანჩესტერ სიტის” პრემიერ ლიგის მოგების შანსი 16%-ით მეტი აქვს, ვიდრე “ლივერპულს” (46%-30%). ეს ნიშნავს, რომ სუპერკომპიუტერის აზრითაც კი “ბარსელონა” ლა ლიგის მოგების რეალური კანდიდატია.

FiveThirtyEight-ს პროგნოზით “რეალი” ჩემპიონატს 78 ქულით დაასრულებს, ბურთების შეფარდება კი მასპინძლებს +42 ექნებათ. “ბარსას” შედეგი 74 ქულა და ბურთების შეფარდება +34 იქნება. შემდეგ მოდის “ატლეტიკო” 67 ქულით.

ლა ლიგის პირველი ტურის შემდეგ გალიდერების ყველაზე დიდი შანსი კი “ბარსას” აქვს. კატალონიელები “რაიოს” მასპინძლობენ და მათ მოგების 73%-იანი შანსი აქვთ. “რეალი” კი “ალმერიას” სტუმრად ეთამაშება და მადრიდული გუნდის მოგების შანსი 66% არის.

რაც შეეხება “კლასიკოებს” – მადრიდში გასამართ დაპირისპირებაში “რეალის” მოგების შანსი 48% არის, ხოლო “ბარსელონასი” – 28%. კატალონიაში კი “ბარსას” მოგება 42%-ით სავარაუდოა, “რეალისა” კი 34%-ით.

ეს პროგნოზები SPI რეიტინგით ითვლება. ყველა გუნდს თავისი რეიტინგი აქვს და თითოეულ მატჩში ამ რეიტინგების გათვალისწინებით შედეგის სიმულირება ხდება, საბოლოოდ კი ჩემპიონატის პროგნოზს ვიღებთ. ამჟამად არსებობს წინასასეზონო რეიტინგები, რომლებიც 2 კომპონენტისგან შედგება – გასული სეზონის ბოლოს არსებული SPI რეიტინგი და ფეხბურთელების საბაზრო ღირებულებისგან შედგენილი SPI რეიტინგი. გასაკვირი არაა, რომ წინა სეზონის გათვალისწინებით “რეალი” “ბარსელონაზე” წინაა. დღეს ამ გუნდების რეიტინგი ასე გამოიყურება – “რეალი” 86.2, “ბარსა” 84.4.