ბარსელონა ანხელ დი მარიასთან მოლაპარაკებებს აწარმოებს

ბოლო პერიოდში “ბარსელონას” ანხელ დი მარია დაუკავშირეს – გავრცელებული ცნობებით, არგენტინელი კატალონიური კლუბისგან შემოთავაზებას ელოდება.

როგორც Mundo Deportivo იტყობინება, მიუხედავად იმისა, რომ აღნიშნული ტრანსფერი გამორცხული არაა, “ბარსა” დი მარიას შეძენაზე მხოლოდ იმ შემთხვევაში იფიქრებს, თუ უსმან დემბელე კონტრაქტს არ გაახანგრძლივებს ან გუნდი რაფინიას მოყვანას ვერ შეძლებს.

34 წლის ფეხბურთელს, რომელიც “პარი სენ-ჟერმენს” თავისუფალი აგენტის სტატუსით ტოვებს, “იუვენტუსისგან” წინადადება აქვს, თუმცა არგენტინელის პრიორიტეტი “ბარსელონაა”.

Relevo-ს ინფორმაციით, “ბლაუგრანა” დი მარიას კანდიდატურას განიხილავს, რადგან მის უნივერსალურობასა და გამოცდილებას აფასებს, რასაც ისიც ემატება, რომ ფეხბურთელს გუნდზე სწრაფი გავლენის მოხდენა შეეძლება.

ანხელს ესპანეთში თამაში სურს და “ბარსა” მოსწონს. მასა და კატალონიურ გრანდს შორის კონტაქტი უკვე შედგა და პოზიტივი შეინიშნება. თანაც, კლუბს არგენტინელის დამატება უფასოდ შეუძლია. თუ ეს ტრანსფერი შედგა, დი მარია “ლურჯ-ბროწეულისფერებთან” 1-წლიან კონტრაქტს გააფორმებს.

აღსანიშნავია ისიც, რომ “იუვენტუსი” ანხელს 2-წლიან ხელშეკრულებას სთავაზობს, მაგრამ არგენტინელი 2023 წელს “როსარიო სენტრალში” დაბრუნებას გეგმავს, რის გამოც, მას “ბარსაში” 1 წლით ასპარეზობის პერსპექტივა უფრო ხიბლავს. 

აღნიშნულ ცნობებს ფაბრიციო რომანო და მატეო მორეტოც ადასტურებენ და დასძენენ, რომ დი მარიამ “ბარსელონას” თანხმობა უკვე განუცხადა. კატალონიელებს მის აგენტთან კავშირი უკვე ჰქონდათ.

ტონი ჟუანმარტის მტკიცებით, “ლურჯ-ბროწეულისფერები” არგენტინელის ტრანსფერზე სერიოზულად მუშაობენ და ქმედითი ნაბიჯები უკვე გადადგეს.

ამ პოზიციაზე ჩავის პრიორიტეტი რაფინიაა, თუმცა, “ლიდს იუნაიტედი” მასში 55 მილიონ ევროს ითხოვს, რაც შეთანხმებას ართულებს (მიუხედავად იმისა, რომ ბრაზილიელმა “ლივერპულის” წინადადება დაბლოკა და მხოლოდ “ბარსაში” გადმოსვლა სურს), უსმან დემბელეზე კი კლუბში უკვე ფიქრობენ, რომ ის თითქმის წასულია. ლონდონში გავრცელებული ცნობებით, ფრანგი “ჩელსის” შეუთანხმდა. 

COPE იუწყება, რომ ამჟამად დი მარია შვებულებას როსარიოში ატარებს და საკუთარ მომავალს მალე გადაწყვეტს. ის არგენტინაში ლიონელ მესის პირადი თვითმფრინავით, თავად ლეოსთან, ჯოვანი ლო სელსოსა და როდრიგო დე პაულთან ერთად გაემგზავრა.