იტალიური გამოცემა Tuttosport-ის მიერ დაწესებული Golden Boy-ის ჯილდოს ისტორიაში ყველაზე წარმატებული კლუბი “ბარსელონაა”. კატალონიური გუნდის ფეხბურთელებმა ევროპის საუკეთესო 21 წლამდე მოთამაშის პრესტიჟული ჯილდო ხუთჯერ მოიპოვეს.
2026 წელს პაუ კუბარსის გამარჯვებით “ბარსელონამ” საკუთარი რეკორდი გააუმჯობესა. 2003 წლიდან ჩატარებული 24 დაჯილდოებიდან ხუთ შემთხვევაში გამარჯვებული სწორედ კატალონიური კლუბის წარმომადგენელი გახდა.
ბარსელონას ხუთი გამარჯვებული
კლუბის ისტორიაში პირველი Golden Boy ლიონელ მესიმ 2005 წელს მოიგო. ამის შემდეგ კატალონიელებს მომდევნო გამარჯვებისთვის 16 წელი დასჭირდათ. 2021 წელს ჯილდო პედრიმ მიიღო, 2022 წელს – გავიმ, 2024 წელს – ლამინ იამალმა, ხოლო 2026 წელს გამარჯვებულთა სიას პაუ კუბარსიც შეუერთდა.
19 წლის ცენტრალური მცველისთვის 2026 წელი განსაკუთრებით წარმატებული აღმოჩნდა. მან “ბარსელონასთან” ერთად ლა ლიგა და ესპანეთის სუპერ თასი მოიგო, ესპანეთის ნაკრების შემადგენლობაში მსოფლიო ჩემპიონი გახდა და მუნდიალის საუკეთესო ახალგაზრდა ფეხბურთელადაც დასახელდა.
კუბარსი Golden Boy-ის ისტორიაში მხოლოდ მეორე მცველია, რომელმაც ეს ჯილდო მოიპოვა. პირველი მატეის დე ლიხტი იყო, რომელმაც 2018 წელს გაიმარჯვა.
რომელი კლუბები მოსდევენ ბარსელონას?
მეორე ადგილზე “მანჩესტერ იუნაიტედია”, რომლის სამმა ფეხბურთელმა შეძლო Golden Boy-ის მოგება. ინგლისური კლუბის წარმომადგენლებიდან ჯილდოს მფლობელები უეინ რუნი (2004), ანდერსონი (2008) და ანტონი მარსიალი (2015) გახდნენ.
ორ-ორი გამარჯვებით მომდევნო პოზიციებს იყოფენ “აიაქსი”, “ატლეტიკო”, დორტმუნდის “ბორუსია” და “პარი სენ-ჟერმენი”.
“აიაქსის” წარმომადგენლებიდან ჯილდო რაფაელ ვან დერ ვაარტმა (2003) და მატეის დე ლიხტმა (2018) მოიგეს. “ატლეტიკოს” ფეხბურთელებიდან გამარჯვებულები სერხიო აგუერო (2007) და ჟოაუ ფელიში (2019) გახდნენ, დორტმუნდის “ბორუსიიდან” – მარიო გიოცე (2011) და ერლინგ ჰოლანდი (2020), ხოლო “პარი სენ-ჟერმენიდან” – კილიან მბაპე (2017) და დეზირე დუე (2025).
რაც შეეხება “რეალ მადრიდს”, მისმა ფეხბურთელმა Golden Boy მხოლოდ ერთხელ მოიგო. ეს 2023 წელს ჯუდ ბელინგემმა მოახერხა და ისიც “დორტმუნდში” ნათამაშები ფეხბურთის გამო.
ამრიგად, “ბარსელონა” ხუთი გამარჯვებით ჯილდოს ისტორიაში ერთპიროვნული ლიდერია. აღსანიშნავია ისიც, რომ კატალონიურმა კლუბმა ბოლო ექვსი დაჯილდოებიდან ოთხში გაიმარჯვა.
2026 წლის გამარჯვებული პაუ კუბარსი კუთვნილ ჯილდოს 14 დეკემბერს, იტალიის ქალაქ ტურინში დაგეგმილ საზეიმო ცერემონიაზე მიიღებს.
forum კომენტარები (0)