ლიეკე მარტენსი პსჟ-ში უფასოდ გადადის

კატალონიური Sport-ის მიერ გავრცელებული ინფორმაციით მსოფლიოს ერთ-ერთი საუკეთესო ქალი ფეხბურთელი ლიეკე მარტენსი “ბარსელონადან” “პარი სენ-ჟერმენში” უფასოდ გადადის და ამას კატალონიელებისთვის მიუღებელი ფორმით აკეთებს.

მარტენსს “ბარსელონასთან” კონტრაქტი თვის ბოლოს უმთავრდება. Sport-ის ცნობით 29 წლის ნიდერლანდელი პსჟ-ს უკვე შეუთანხმდა. ის დღეს საფრანგეთის დედაქალაქში იმყოფებოდა და სამედიცინო შემოწმება გაიარა, მალე კი პარიზულ კლუბთან 3 წლიან კონტრაქტს გააფორმებს. გავრცელებული ინფორმაციით ის მსოფლიოს ყველაზე მაღალანაზღაურებად სამ ქალ ფეხბურთელს შორის იქნება.

რამ გააღიზიანა “ბარსა”? კატალონიელებმა მარტენსს ახალი კონტრაქტი დაახლოებით ერთი წლის წინ შესთავაზეს და სიტყვიერი თანხმობაც მიიღეს, მაგრამ ნიდერლანდელი კონტრაქტს ხელს არა და არ აწერდა. როგორც ირკვევა, მარტენსმა პსჟ-სთან შეთანხმებას ჯერ კიდევ თებერვალში მიაღწია, რის შესახებაც “ბარსელონასთვის” მას დღემდე არაფერი უთქვამს. ბოლოს ნიდერლანდელმა “ბლაუგრანას” წარმომადგენლების ზარსაც კი არ უპასუხა.

ლიეკე მარტენსი “ბარსელონაში” 2017 წელს გადმოვიდა. იმავე წელს ის FIFA-სა და UEFA-ს ვერსიით საუკეთესო ფეხბურთელად დასახელდა. მარტენსმა “ბარსას” მაისურით 156 თამაში ჩაატარა, 73 გოლი გაიტანა და 13 ტიტული მოიგო.