ლეო მესი: ბარსელონაში მყავდა თანაგუნდელები, რომლებთან ერთადაც მთელი გულით ვთამაშობდი

“ბარსელონაში” მყავდა თანაგუნდელები, რომლებთან ერთადაც მთელი გულით ვთამაშობდი.

რთული გასაგებია, რა მოხდა. “ბარსას” დატოვებას არ ველოდი – ეს შოკი იყო. მსგავს სცენარს ვერასდროს წარმოვიდგენდი.

ბევრი წარუმატებლობის შემდეგ, არგენტინის ნაკრებთან ერთად კოპა ამერიკის მოგება უდიდესი სიამოვნება იყო და ვფიქრობდი, რომ ყველაფერი ჩვეულებრივად გაგრძელდებოდა, მაგრამ, საბოლოოდ, ეს (“ბარსელონადან” წასვლა) მოხდა. 

ბარსელონაში ყველაფერი მქონდა. ამ ქალაქში ბავშვობაში ჩამოვედი – სიმართლე ისაა, რომ კატალონიაში უფრო დიდხანს ვიცხოვრე, ვიდრე არგენტინაში. ბარსელონაში ცხოვრება შესანიშნავი იყო, არაფრის შეცვლას არ ვაპირებდი.

აგუერო ძალიან მენატრება. მთელ დღეს მასთან ვატარებდი, ერთად ვდგებოდით, ერთად ვიძინებდით, ყველაფერს ერთად ვაკეთებდით… დიახ, კუნი მაკლია.

მსოფლიო ჩემპიონატი? მუნდიალზე მარტივი მეტოქეები არ არსებობენ. ტურნირი რთული იქნება.

ეჭვგარეშეა, რომ ქარიმ ბენზემა “ოქროს ბურთს” იმსახურებს. მას გასაოცარი სეზონი ჰქონდა, რომელიც ჩემპიონთა ლიგის მოგებით დააგვირგვინა.

ლევანდოვსკის სიტყვები? ყველა იმას ამბობს, რაც სურს. ამას დიდ მნიშვნელობას არ ვანიჭებ და არ მაინტერესებს. რობერტის ნათქვამს არ ვეთანხმები. აღვნიშნე, რომ პოლონელს “ოქროს ბურთი” ეკუთვნოდა, მაგრამ არა იმ წელს, როცა ეს ჯილდო მე მოვიგე. 

ფინალისიმა? ეს ოფიციალური ტურნირია, რომელსაც UEFA აღიარებს. მინდა, ჩემთვის, “ალბისელესტესა” და არგენტინელი ხალხისთვის კიდევ ერთი თასი მოვიგო. 

კორონავირუსმა ჩემი ფილტვები ძალიან დააზიანა. ძლიერი სიმპტომები მქონდა – ხველა, ყელის ტკივილი, ცხელება და ა.შ. ვერ ვვარჯიშობდი.

ჩემპიონთა ლიგის მოსაგებად საუკეთესო გუნდის ყოლა საჭირო არაა. არის სიტუაციები, მომენტები და ფსიქოლოგიური ფაქტორები… შესაძლოა, გათამაშებას მცირე დეტალის გამო გამოეთიშო. “რეალი” წელს ყველაზე ძლიერი კლუბი არ იყო, მაგრამ მათ ყველა დაამარცხეს.

ეროვნულ ნაკრებთან ერთად ყოფნა ყოველთვის სასიამოვნოა. ალბათ, ამას ტელევიზორში და სოციალურ ქსელებში ხედავთ.

რას გავაკეთებ მსოფლიო ჩემპიონატის შემდეგ? არ ვიცი, ბევრი რამის გაანალიზება მმართებს. გულწრფელად რომ ვთქვა, ეს ჩემთვის რთული ჩანს.

არგენტინელი ჟურნალისტები და, ზოგადად, ხალხი ნაკრებსა და ჩემს მიმართ აგრესიულნი იყვნენ, მაგრამ ყველაფერი შეიცვალა. ახლა ისინი მეტი პატივისცემით მესაუბრებიან.

2026 წლის მსოფლიო ჩემპიონატზე ჩემი თამაში? ჯერ ეს მუნდიალი დავასრულოთ და შემდეგ ვნახოთ, რა მოხდება. შესაძლოა, ბევრი რამ მოხდეს. 

მბაპეს სიტყვები CONMEBOL-ზე? არ ვიცი, კილიანმა რა თქვა. როცა ამ საკითხზე ესპანელებთან ვსაუბრობდი, ვხედავდი, რომ მათ კარგად ესმოდათ, როგორი რთულია მსოფლიო ჩემპიონატზე გასვლა და სამხრეთ ამერიკაში ასპარეზობა.

იტალია მსოფლიო ჩემპიონატზე რომ გასულიყო, ტურნირის ფავორიტი იქნებოდა.

არგენტინისთვის, ჩემი შვილებისა და ცოლისთვის ვთამაშობ.

არასდროს მიფიქრია, რომ ოდესმე “ბარსელონას” გარდა სხვა კლუბში ვითამაშებდი, მაგრამ ასე მოხდა.

მარადონასთვის მიძღვნილი გოლი? როცა დასაძინებლად მივდიოდით, ანტონელას ვუთხარი, რომ დიეგოსთვის რამე უნდა გაგვეკეთებინა. ჩემი სახლის ზედა სართულზე მუზეუმია, სადაც ჯილდოები და ფორმები ინახება – იქ შევედი და სკამზე მარადონას “ნიუელს ოლდ ბოისის” 10-ნომრიანი მაისური დამხვდა. არც მახსოვდა, რომ ის მქონდა.

არგენტინის ნაკრებში ყველა მატჩს ფინალივით ვთამაშობთ.