ბარსელონა “ახალი პუიოლის” დამატებასთან ახლოსაა

“ბარსელონა” ახალ პუიოლად მონათლული ახალგაზრდა მცველის, არნაუ მარტინესის დამატებასთან ახლოსაა. ინფორმაციას ესპანური გამოცემა Area Tecnica ავრცელებს.

არნაუ მარტინესი 19 წლის კატალონიელი ცენტრალური მცველია, რომელიც ესპანეთის მე-2 დივიზიონში მოთამაშე “ჟირონაში” გამოდის. წყაროს ცნობით “ბარსელონასა” და ფეხბურთელს შორის სიტყვიერი შეთანხმება უკვე არსებობს. “ბარსა” გამოსასყიდ თანხას გადაიხდის, რომელიც ახლა 5 მილიონი ევროა, მაგრამ თუ “ჟირონა” პრიმერა დივიზიონში გადმოვა, 10 მილიონი გახდება. “ბლაუგრანა” აპირებს, რომ ყიდვის შემდეგ მარტინესი “ჟირონაში” 2 წლით გაანათხოვროს.

რა ვიცით არნაუ მარტინესის შესახებ? მას კარლეს პუიოლს ადარებენ. პუიოლის მსგავსად ცენტრალური მცველისთვის საჭირო სიმაღლით არც ის გამოირჩევა, ისიც დაცვის ცენტრსა და მარჯვენა ფლანგზე თამაშობს. თუმცა მეტსახელი “ახალი პუიოლი” მას სხვა რამის გამო შეარქვეს. ესპანეთის 19 წლამდელთა ნაკრებში თამაშის დროს მან კუთხურიდან ჩამოწოდების შემდეგ გოლი თავით გაიტანა, რა დროსაც ჟურნალისტმა ჟოზეპ კაპდევილიამ მარტინესი სწორედ ასე მოიხსენია.

მიუხედავად იმისა, რომ ცენტრალური მცველია, არნაუ მარტინესი საგოლე გადაცემების სიხშირით გამოირჩევა. სეგუნდა დივიზიონის მიმდინარე გათამაშებაში მის აქტივში უკვე 6 შედეგიანი პასია.

შეტევის გარდა არნაუ, რა თქმა უნდა, გამოირჩევა დაცვაში თამაშით. მიმდინარე სეზონში მის აქტივში უკვე 48 შედეგიანი ვარდნაა, რაც ტურნირის საუკეთესო ხუთ შედეგში შედის.

საინტერესოა, რომ არნაუ მარტინესი “ბარსას” სკოლის აღზრდილია. 2010-2016 წლებში ის “ბლაუგრანას” აკადემიაში ირიცხებოდა, რის შემდეგაც “ოსპიტალეტის” სკოლაში გადავიდა. ახლა კი კლუბს მასში 5 ან 10 მილიონის გადახდა მოუწევს.