სიუდად ვალენსია – რთული სტადიონი ბარსელონასთვის

ერთი შეხედვით დღეს “ბარსელონას” იოლი თამაში ელის. ლა ლიგაში საუკეთესო ფორმაში მყოფი გუნდი ბოლოსწინა ადგილზე მყოფ “ლევანტეს” სტუმრობს. თუმცა “სიუდად დე ვალენსიაზე” “ბარსელონას” მიერ დაფიქსირებული ბოლო შედეგები მშვიდად ყოფნის საფუძველს ნამდვილად არ გვაძლევს.

“ლევანტესთან” სტუმრად გამართულ შეხვედრებში “ბარსას” პრობლემები დაიწყო წაგებით, რომელიც ყველას მტკივნეულად გვახსოვს. 2018 წლის მაისში “ბარსელონა” ანგარიშით 4-5 დამარცხდა. პრაგმატული თვალსაზრისით ეს წაგება არაფერს ნიშნავდა, მაგრამ “ლევანტემ” წაგვართვა შანსი, ლა ლიგის ის გათამაშება წაუგებლად ჩაგვემთავრებინა.

ამის შემდეგ ვალენსიაში მარტივი გასეირნება გვქონდა – 5-0 მოგება “სიუდად დე ვალენსიაზე”.

ბოლო სამ მატჩში კი საქმე კარგად ნამდვილად არ მიგვდის. ჯერ 1-2 მარცხი, შემდეგ 1-3 მარცხი, ბოლოს კი 2-0 დაწინაურების მიუხედავად 3-3 და ქულების დაკარგვა.

“ლევანტესთან” სტუმრად გამართულ ბოლო 5 შეხვედრაში “ბარსელონამ” მხოლოდ 1 მოიგო, 3 კი წააგო.