ვფიქრობდი, რომ ბარსელონაში თამაშს არ ვიმსახურებდი – ინტერვიუ რონალდ არაუხოსთან

“ბარსელონას” სხვა გუნდებისგან, თუნდაც სხვა ესპანური გუნდებისგან, განსხვავებული ფილოსოფია აქვს.  

აქ მოსვლის შემდეგ გარკვეული დრო დამჭირდა იმის გასაგებად, თუ როგორ უნდა მეთამაშა სწრაფად. ბურთს დიდი სიჩქარით ვიღებდი. როდესაც მის დამუშავებას ვცდილობდი, არ გამომდიოდა და სახლში დამწუხრებული ვბრუნდებოდი. 

ვფიქრობდი: “თუ ბურთის კონტროლი და სწორად თამაში არ შემიძლია, აქ ყოფნას არ ვიმსახურებ”. მაგრამ დიდი შრომის, სიმტკიცისა და ძალისხმევის მეშვეობით, მივხვდი, რომ თამაში და წუთების მიღება შემეძლო.

თავს ბედნიერად ვგრძნობ, რომ ამ გუნდში თამაში შემიძლია. სწორედ ამიტომ ვმუშაობდი თავდაუზოგავად. ღმერთის წყალობით, ახლა საპასუხოს ვიღებ. 

დედაჩემმა ფეხბურთზე ოთხი თუ ხუთი წლის ასაკში შემიყვანა. მე გოლების გატანა მომწონდა და ამიტომ ყოველთვის თავდამსხმელად ან ნახევარმცველად ვთამაშობდი. მონტევიდეოში 16 ან 17 წლის ასაკში ჩავედი. ჩემი განვითარების ტემპი ძალიან სწრაფი იყო.

“რენტისტასის” ახალგაზრდულ გუნდში 6 თვე ვითამაშე. ეს მონტევიდეოს მთავარი გუნდია. ჩემმა პირველმა მწვრთნელმა, სერხიო კუბრერამ მითხრა, რომ თუ ამ პოზიციებზე თამაშს განვაგრძობდი, შეიძლებოდა, წარმატებისთვის ვერ მიმეღწია, მაგრამ მქონდა პოტენციალი, დიდებული მცველი გავმხდარიყავი. 

ჩემი ერთ-ერთი ძლიერი მხარე ერთი-ერთზე თამაშია. შეგიძლია, ბურთთან ერთად ტექნიკა აითვისო, თუმცა დაცვაში თამაში განსხვავებული რამაა, რაც ინდივიდიდან მოდის, ეს მნიშვნელოვანი თვისებაა.