ბარსელონა და ბრაზილია რაფინიას სათამაშო დროის მართვაზე შეთანხმდნენ

ბრაზილიის ნაკრებში რაფინიას დაბრუნებამ “ბარსელონაში” გარკვეული შეშფოთება გამოიწვია, თუმცა, როგორც ბრაზილიური გამოცემა Globo იუწყება, კლუბსა და ბრაზილიის ფეხბურთის კონფედერაციას შორის ფეხბურთელის სათამაშო დროის მართვასთან დაკავშირებით შეთანხმება არსებობს.

კარლო ანჩელოტიმ “ბარსელონას” შემტევი ნოემბრის სანაკრებო პაუზისთვის გამოიძახა. ბრაზილია 14 ნოემბერს იაპონიას დაუპირისპირდება, 17 ნოემბერს კი სინგაპურს შეხვდება. ორივე ამხანაგური მატჩი სინგაპურის ეროვნულ სტადიონზე გაიმართება.

Globo-ს ინფორმაციით, “ბარსელონა” და ბრაზილიის ფეხბურთის კონფედერაცია კოორდინირებულად მოქმედებენ რაფინიას სათამაშო დროის სამართავად, რათა ფეხბურთელი კლუბში ჯანმრთელი დაბრუნდეს და ნაკრებში ყოფნისას მორიგი ტრავმის მიღების რისკი შემცირდეს.

კონკრეტულად რამდენ წუთს ითამაშებს რაფინია ამ ორ შეხვედრაში, ჯერჯერობით უცნობია.

კატალონიური კლუბის სიფრთხილე გასაგებია. 2026 წელს ბრაზილიელ შემტევს კუნთის პრობლემები არაერთხელ შეექმნა, მათ შორის ნაკრებში თამაშის დროს.

ბოლო ასეთი შემთხვევა სექტემბერში, ავსტრალიასთან ამხანაგურ შეხვედრაში დაფიქსირდა. რაფინიამ მარჯვენა ბარძაყის უკანა ნაწილში დისკომფორტი იგრძნო და პირველი ტაიმის შემდეგ შეცვალეს. სამედიცინო გამოკვლევამ მცირე კუნთოვანი შეშუპება გამოავლინა, რის გამოც ბრაზილიის ნაკრებმა ფეხბურთელი ინდოეთთან მატჩის წინ გაათავისუფლა და სამკურნალოდ “ბარსელონაში” დაბრუნების საშუალება მისცა.

ჰანსი ფლიკმა რაფინიას დატვირთვის კონტროლის აუცილებლობაზე ჯერ კიდევ ოქტომბრის ბოლოს ისაუბრა. გერმანელმა სპეციალისტმა აღნიშნა, რომ ფეხბურთელი გუნდისთვის ძალიან მნიშვნელოვანია და მისი სათამაშო წუთების გონივრული განაწილება სასურველი იქნებოდა.

რაფინია ბრაზილიის ნაკრებს უკვე შეუერთდა. მან 8 ნოემბერს, “ატლეტიკოსთან” მატჩში, ბოლო სანაკრებო პაუზის შემდეგ პირველად ითამაშა სრული 90 წუთი.

ბრაზილიისა და იაპონიის შეხვედრა 14 ნოემბერს, თბილისის დროით 14:15 საათზე დაიწყება, სინგაპურთან მატჩი კი 17 ნოემბერს, 14:00 საათზე.