ბარსელონა ლაკაზეტის უფასოდ დამატებით დაინტერესდა

“ბარსელონა” ლონდონის “არსენალიდან” კიდევ ერთი თავდამსხმელის უფასოდ დამატებაზე ფიქრობს. საუბარი ალექსანდრ ლაკაზეტზეა.

30 წლის ფრანგ თავდამსხმელს “მეთოფეებთან” კონტარქტი მიმდინარე სეზონის ბოლოს უმთავრდება და მხარეები ახალი ხელშეკრულების პირობებზე ვერ თანხმდებიან. დიდი შანსია, ლაკაზეტმა კლუბი უფასოდ დატოვოს და ფრანგულ L’Equipe-ზე დაყრდნობით ესპანური Sport იტყობინება, რომ “ლიონის” გარდა მისი დამატების სურვილს “ბარსელონაც” გამოთქვამს.

ცნობილია, რომ ზაფხულში “ბლაუგრანა” შეტევის ხაზში ცვლილებებს გეგმავს. იდეალურ ვარიანტში კლუბს რომელიმე სუპერფორვარდი შეუერთდება, მაგრამ ფინანსური პრობლემების გამო ხმაურიანი ტრანსფერი, შესაძლოა, ერთი წლით გადაიდოს. ასეთ შემთხვევაში “ბარსა” შედარებით მოკრძალებულ ტრანსფერს დასთანხმდება.

ალექსანდრ ლაკაზეტი “ლიონიდან” “არსენალში” 2017 წელს 53 მილიონი ევროს სანაცვლოდ გადავიდა. ლონდონურ გუნდში მან 199-ჯერ ითამაშა, 71 გოლი გაიტანა და 36 შედეგიანი გადაცემა გააკეთა. მიმდინარე სეზონში ჩატარებულ 29 მატჩში ფრანგის აქტივში 6 გოლი და 8 საგოლე გადაცემაა, რაც ის შედეგი არაა, რასაც ლონდონელები მისგან ელიან.