ელ კლასიკოს მსაჯი ცნობილია | სტატისტიკა

რამდენიმე წუთის წინ ესპანეთის ჩემპიონატის 29-ე ტურის მსაჯების ვინაობა გახდა ცნობილი. ფეხბურთის ფედერაციამ მთავარი დაპირისპირების, “ელ კლასიკოს” განსასჯელად გამოცდილი არბიტრი ხუან მარტინეს მუნუერა მიავლინა.

მარტინეს მუნუერა 39 წლისაა. მან მსაჯობა 2006 წელს დაიწყო, 2010 წელს ის სეგუნდა დივიზიონში, 2013 წელს კი პრიმერაში დააწინაურეს. მუნუერა FIFA-ს მსაჯი 2015 წლიდანაა, 2016/17 წლებში კი Marca-მ ის სეზონის საუკეთესო ესპანელ არბიტრად დაასახელა.

მარტინეს მუნუერა კარიერის განმავლობაში თამაშში საშუალოდ 26.8 ჯარიმასა და 0.29 თერთმეტმეტრიანს ნიშნავს. ის ფეხბურთელებს საშუალოდ 4.55 ყვითელ და 0.17 წითელ ბარათს უჩვენებს. ლა ლიგის მოქმედ მსაჯებს შორის მუნუერა ყვითელი ბარათების ჩვენების სიხშირით მე-16, ხოლო წითელი ბარათების მხრივ მე-17 ადგილზეა.

მუნუერას მიერ განსჯილი თამაშების 46%-ში მასპინძელი გუნდი იმარჯვებს, ხოლო 32%-ში სტუმარი გუნდი. ლა ლიგის მოქმედ მსაჯებს შორის მასპინძელი გუნდის მოგებებით ის მე-8 ადგილზეა.

მარტინეს მუნუერას “ელ კლასიკოში” აქამდე ერთხელ უმსაჯია. 2020/21 წლების სეზონში “კამპ ნოუზე” გამართული შეხვედრა “რეალმა” 3-1 მოიგო. ეს ის თამაშია, არბიტრმა რამოსის წაქცევისთვის “ბარსას” კარში ძალიან საეჭვო თერთმეტმეტრიანი რომ დანიშნა, რომელიც საბოლოოდ გადამწყვეტი გამოდგა.

“ბარსელონას” მატჩში მუნუერას 29-ჯერ უმსაჯია. კატალონიელებმა 19 თამაში მოიგეს, 6 ფრედ დაასრულეს და 4 წააგეს. ამ არბიტრის შეხვედრებში მოგების ყველაზე მაღალი, 66% მაჩვენებელი სწორედ “ბარსას” აქვს. შემდეგ მოდის “რეალი” 62%-ით. ამ 29 შეხვედრაში მარტინესმა 9 თერთმეტმეტრიანი დანიშნა და 4 წითელი ბარათი აჩვენა, საიდანაც 6 პენალტი და 3 წითელი ბარათი “ბარსას” სასარგებლოდ იყო.

მუნუერას “რეალის” თამაშშიც 29-ჯერ უმსაჯია. მადრიდელებმა 18-ჯერ მოიგეს, 6-ჯერ ფრედ ითამაშეს და 5-ჯერ წააგეს. 9 თერთმეტმეტრიანიდან და 3 წითელი ბარათიდან 6 პენალტი და 2 გაძევება მადრიდელთა სასარგებლოდ იყო.

რაც შეეხება ვიდეორეფერის – ამ პოზიციაზე კიდევ ერთი გამოცდილი ესპანელი არბიტრი ანტონიო მატეუ ლაოსი იქნება.

“ელ კლასიკო” კვირას, 20 მარტს, 23:55 საათზე გაიმართება.