დავა შეთანხმებით დასრულდა – ბარსა სანტოსის ტალანტებზე შეღავათიანი შესყიდვის უფლებით ისარგებლებს

2016 წელს “ბარსელონასა” და “სანტოსს” შორის დაწყებულმა სასამართლო დავამ, “ბარსას” საშუალება მისცა, ბრაზილიური კლუბის ორი ახალგაზრდა ფეხბურთელი: ცენტრალური მცველ კაიკი ფერნანდესი და ცენტრალური თავდამსხმელის ანგელო გაბრიელი შეღავათიან ფასად დაიმატოს. 

ყველაფერი 2013 წელს დაიწყო. ნეიმარის ტრანსფერში ჩაიდო პუნქტი, რომლის მიხედვითაც “ბარსელონას” “სანტოსის” 3 ფეხბურთელზე შეღავათიანი შესყიდვის უფლება ჰქონდა, რაც იმას ნიშნავს, რომ თუ რომელიმე კლუბი მათი შეძენით დაინტერესდებოდა, ბრაზილიელებს ეს პირველ რიგში კატალონიელთათვის უნდა შეეტყობინებინათ და ისინი გადაწყვეტდნენ, გაიფორმებდნენ თუ დათმობდნენ მათ. ერთ-ერთი მათგანი იყო გაბრიელ ბარბოსა, იგივე გაბიგოლი, რომელიც “სანტოსმა” მილანის “ინტერში” ისე გაყიდა, რომ “ბარსას” არაფერი აცნობა. 

“ბლაუგრანამ” კონტრაქტის პირობის დარღვევის “თევზებს” FIFA-ში უჩივლა, რომელმაც, დაახლოებით ერთი წლის წინ, ბრაზილიურ კლუბს კატალონიელთათვის 2.9 მილიონი ევროს გადახდა დააკისრა. ეკონომიკურ კრიზისში მყოფმა “სანტოსმა” აღნიშნული გადაწყვეტილების გასაჩივრება ვერ გაბედა, ამიტომ ახალმა ხელმძღვანელობამ “ბარსასთან” მორიგება გადაწყვიტა და კლუბს ორ ფეხბურთელზე შეღავათიანი შესყიდვის უფლებით სარგებლობა შესთავაზა და, როგორც Sport გვამცნობს, მხარეებს შორის შეთანხმება შედგა.

ასე და ამგვარად, “ბარსამ” ხელში ორი ამომავალი ვარსკვლავი ჩაიგდო.

17 წლის ანგელო გაბრიელი მემარცხენე გარემარბია, რომელიც ტექნიკითა და დრიბლინგის უნარით გამოირჩევა და მოედნის ორივე მხარეს შეუძლია თამაში. ანგელო 2004 წელს დაბადებულ ფეხბურთელებს შორის საუკეთესოდ ითვლება. მას ბრაზილიის ახალგაზრდულ ნაკრებებში თამაშის გამოცდილება აქვს. გაბრიელს “სანტოსის” პირველ გუნდში დებიუტი 2020 წელს ჰქონდა და გუნდის ისტორიაში მეოთხე ყველაზე ახალგაზრდა მოთამაშე გახდა – მან პელეს შედეგი გააუმჯობესა. 17 წლის ტალანტმა პროფესიონალურ კარიერაში 51 მატჩი ჩაატარა და მხოლოდ ერთი გოლი გაიტანა, თუმცა ის გოლი ისტორიული გამოდგა – 16 წლის, 3 თვისა და 16 დღის ანგელო ყველაზე ახალგაზრდა ფეხბურთელი გახდა, რომელმაც აღნიშნულ ტურნირზე თავი გამოიჩინა, მან ხუან კარლოს კარდენასის 59-წლიანი რეკორდი დაამხო. გაბრიელმა “სანტოსთან” კონტრაქტი 2024 წლამდე გააფორმა და მისი კიდევ 2 წლით გახანგრძლივება შეუძლია.

18 წლის კაიკი თავის ასაკში ბრაზილიაში საუკეთესო ცენტრალური მცველია. იგი სწრაფი და გაბედული უკანახაზელია, რომელიც ერთი ერთზე კარგად თამაშობს. ფერნანდესი გამოირჩევა ტექნიკით და ბურთს კარგად ფლობს, რაც “ბარსას” პროფილის ფეხბურთელისთვის მნიშვნელოვანია. კაიკუ, რომელიც სიმაღლით 1.84 მეტრია, თავით, როგორც დაცვაში, ისე შეტევაში, შესანიშნავად თამაშობს. ბრაზილიელი “სანტოსის” პირველ გუნდს 2021 წელს შეუერთდა და 37 მატჩი ჩაატარა, რომელთაგან 36 ძირითადი შემადგენლობიდან დაიწყო. კაიკუს “თევზებთან” კონტრაქტი 2023 წელს ეწურება, კლუბმა მის აგენტთან მოლაპარაკებები უკვე დაიწყო.