ესპაი ბარსა – ლაპორტასა და რევერტერის პრესკონფერენცია

ასამბლეაზე კლუბის წევრებმა “ესპაი ბარსას” განხორციელებას მხარი დაუჭირეს. ეს არის ისტორიული გადაწყვეტილება. “ესპაი ბარსა” არის არა ხარჯი, არამედ ინვესტიცია, რომელიც მომავალში კლუბს მნიშვნელოვან შემოსავალს მოუტანს.

ჩვენ გვსურს, რომ ასამბლეაზე მიღებული გადაწყვეტილების რატიფიცირება მოვახდინოთ. ვატარებთ რეფერენდუმს, რადგან ვრჩებით დემოკრატიული ტრადიციების ერთგულნი. ამ რეფერენდუმის ელექტრონულ ფორმატში ჩატარება კლუბის წევრთა მაქსიმალური აქტივობის მიღების საშუალებას მოგვცემს. 

ამ პროექტის განხორციელება კლუბისთვის აუცილებლობას წარმოადგენს, რათა გავაგრძელოთ პროგრესი და უმაღლეს დონეზე ასპარეზობა. “ესპაი ბარსა” თვითდაფინანსებას შეძლებს. წელიწადში, დაახლოებით, 200 მილიონი ევროს შემოსავალს ვვარაუდობთ.

გვინდა, ხაზი გავუსვათ ამ რეფერენდუმის მნიშვნელობას. ეს არის ისტორიული მომენტი, რომელიც ისტორიაში პირველად, მსოფლიოს გარშემო კლუბის 100 000 წევრს საშუალებას მისცემს, მისცეს ხმა.

“ესპაი ბარსას” ასამბლეამ მხარი დიდი უმრავლესობით დაუჭირა, თუმცა პროექტის მასშტაბიდან გამომდინარე, გვსურს, რომ გადაწყვეტულება რეფერენდუმითაც დავადასტუროთ.

ინვესტიციის დაგეგმილი ოდენობა 1.5 მილიარდი ევრო იქნება. ეს არის 4-წლიანი პროექტი და ბევრი რამ შეიძლება მოხდეს. ეს არის ძალიან რეალისტური პროგნოზი, მაგრამ გაუთვალისწინებელი მოვლენები ყოველთვის ხდება.

900 მილიონი ევრო “კამპ ნოუსთვის” იქნება განკუთვნილი, 420 – “პალაუსთვის” (კალათბურთი), “პეტიტ პალაუსთვის” (მუსიკალური დარბაზი), “პისტა დე გელისთვის” (საციგურაო მოედანი) და ავტობუსის სადგურისთვის. 100 მილიონი ევრო – “კამპუსისთვის” (ურბანული პროექტი), 60 მილიონი – მეტროპოლიტენის მოდიფიკაციისთვის და 20 მილიონი “ესტადი იოჰან კრუიფისთვის”.

ამ პროექტების ამოქმედება, წელიწადში, დაახლოებით, 200 მილიონ ევროს მოგვიტანს. ინვესტორებისთვის გარანტიას სამომავლო შემოსავალი წარმოადგენს. თანხის გადახდა პროექტის დასრულების შემდეგ დაიწყება და 35 წელიწადზე იქნება გადანაწილებული.

გვსურს, რომ სამუშაოები მომდევნო წელს დავიწყოთ. პროექტის დასრულება 2025 წელს არის დაგეგმილი.