დანი ალვესი ბარსელონას ისტორიაში ყველაზე ასაკოვანი შენაძენია

Mundo Deportivo-ს ინფორმაციით, დანი ალვესი “ბარსელონას” ყველა დროის ყველაზე ასაკოვანი ფეხბურთელია, რომელიც კლუბმა შეიძინა.

აღნიშნული წყაროს ცნობით, ბრაზილიელმა ლეგენდამ, – 38 წლის, 6 თვისა და 6 დღის ასაკში, – ლილიან ტურამის მაჩვენებელი გააუმჯობესა.

კატალონიური გამოცემის თანახმად, დანი ლა ლიგის მიმდინარე სეზონში რიგით მე-5 ყველაზე ასაკოვანი მოთამაშე იქნება – მას ხაოკინი (“ბეტისი”), დიეგო ლოპესი (“ესპანიოლი”), ხორხე მოლინა (“გრანადა”) და კლაუდიო ბრავო (“ბეტისი”) უსწრებენ.

ასევე, საინტერესოა, რომ ვინაიდან დანი იანვრამდე ვერ ითამაშებს, Transfermarkt-ის თანახმად, ის, პირველივე მატჩში, რომელშიც მონაწილეობას მიიღებს, ხოსე მანუელ პინტოს რეკორდს მოხსნის და “ბარსას” ისტორიაში ყველაზე ასაკოვანი ფეხბურთელი გახდება – კატალონიელთა ყოფილი მეკარე 2014 წლის 17 მაისს, მადრიდის”ატლეტიკოს” წინააღმდეგ, მოედანზე 38 წლის, 6 თვისა და 9 დღის ასაკში გავიდა.

“ბლაუგრანამ” ალვესის დაბრუნება გუშინ ოფიციალურად დაადასტურა. ბრაზილიელი უკვე ბარსელონაშია და მზადაა, გუნდთან ერთად ვარჯიში დაიწყოს.