დრო, როდესაც ბარსელონა იურგენ კლოპს მიუახლოვდა

ერთი შეხედვითაც აშკარაა, რომ ახლა “ბარსელონაში” მძიმე სიტუაციაა. კატალონიური გუნდის მწვრთნელი ჯერ კიდევ რონალდ კუმანია, მაგრამ, ხელმძღვანელობის ნდობის მიუხედავად, ყველაფერი იმაზე მიუთითებს, რომ მისი სამწვრთნელო კარიერა “ბლაუგრანაში” დასასრულს უახლოვდება.

“ბარსას” არაერთი სპეციალისტის სახელს უკავშირებენ – რობერტო მარტინესი, მარსელო გალიარდო, ანდრეა პირლო, ჩავი ერნანდესი, ერიკ ტენ ჰაგი. თუმცა, მწვრთნელის შეცვლა ამ ეტაპზე იოლი არაა. კონტაქტები, უამრავი ზარი, შეტყობინებები… ეს ყველაფერი მხოლოდ პირველი წინგადადგმული ნაბიჯებია.

Sport-ის მიერ გავრცელებული ინფორმაციით, იქამდე, სანამ “ბარსელონაში” ყველაფერი აირეოდა და თავდაყირა დადგებოდა, კატალონიური კლუბი კიდევ ერთ ელიტურ მწვრთნელს დაუკავშირდა. ამ ზარს შემდეგ საერთოდ არაფერი მოჰყოლია, მაგრამ რეალობა ისაა, რომ ამას “ბარსასთვის” ბევრი რამის შეცვლა შეეძლო. ეს მწვრთნელი “ლივერპულის” ახლანდელი დამრიგებელი იურგენ კლოპი იყო.

წყაროს ცნობით, გასული წლის ბოლოს, წინასაარჩევნო კამპანიის დროს, “ბარსელონას” ერთ-ერთი საპრეზიდენტო კანდიდატი ჟორდი ფარე კლოპის გარემოცვას დაუკავშირდა იმის გასარკვევად, დაინტერესებული იქნებოდა თუ არა გერმანელი სპეციალისტი კატალონიური გუნდის გაწვრთნით. თავდაპირველი პასუხი უარყოფითი იყო, თუმცა ფარეს სჯეროდა, რომ მისი გაპრეზიდენტების შემთხვევაში იურგენთან მოლაპარაკებები გაგრძელდებოდა.

იგივე წყარო იტყობინება, რომ ფარეს ფავორიტი სწორედ კლოპი იყო. იგი დარწმუნებული იყო, რომ მისი პრეზიდენტად არჩევის შემთხვევაში “ბარსას” კუმანის შეცვლაზე დიდი ყურადღება უნდა გაემახვილებინა.

საბოლოოდ, ფარემ არჩევნებში მხოლოდ 2 082 ხმა მიიღო, დასრულდა მისი პრეზიდენტობაზე ოცნება და ამასთან ერთად, რაც არ უნდა მცირე ყოფილიყო, კლოპის მოყვანის შანსებიც გაქრა.