ოსკარ გარსია – ბარსელონას მწვრთნლობის ახალი კანდიდატი

რონალდ კუმანის მთავარი მწვრთნელის პოსტიდან მოხსნა მხოლოდ დროის ამბავია – დიდი ალბათობით, “ბარსელონას” ხელმძღვანელობა ჰოლანდიელ სპეციალისტს შესაფერისი კანდიდატის პოვნისთანავე გაათავისუფლებს. 

აქამდე პრესა ორ კანდიდატზე წერდა: საუბარია ჩავი ერნანდესზე, რომელიც უკვე დიდი ხანია, “ბარსას” ჩასაბარებლად ემზადება და ბელგიის ნაკრების ხელმძღვანელ რობერტო მარტინესზე. 

რამდენიმე წუთის წინ კი ფრანგულმა RMC Sport-მა ახალი კანდიდატი დაასახელა. ეს არის ოსკარ გარსია, ლიგა 1-ის “რეიმსის” მწვრთნელი. 

გარსია “ბარსას” ყოფილი ფეხბურთელია. ის “ლა მასიას” აღზრდილია, პირველ გუნდში 1993-99 წლებში თამაშობდა და სამწვრთნელო კარიერაც ამ კლუბში დაიწყო. 2009-12 წლებში ოსკარი 19-წლამდელთა გუნდს ხელმძღვანელობდა. ამის შემდეგ ის თელ ავივის “მაკაბიში”, “ზალცბურგში”, “სელტასა” და სხვა კლუბებში მუშაობდა. 

48 წლის სპეციალისტი იორდი კრუიფთან დაახლოებული პირია და კუმანის სავარაუდო შემცვლელთა შორის მისი სახელის გაჟღერება ალბათ სწორედ ამას უკავშირდება.