გრიზმანი მესისთან ერთად აღარ ითამაშებს? – ანტუანს პეპ გვარდიოლა დაუკავშირდა

თითქმის გადაწყვეტილია, რომ თუ ლიონელ მესი “ბარსელონაში” დარჩება, გუნდს ანტუან გრიზმანი დატოვებს – აცხადებს Onda Cero-ს ცნობილი კატალონიელი ჟურნალისტი, ალფრედო მარტინესი. 

ლეო მესის “ბარსასთან” მოქმედი კონტრაქტი ამოეწურა, თუმცა კლუბის ხელმძღვანელებს ეჭვი არ ეპარებათ იმაში, რომ არგენტინელი ხელშეკრულებას გაახანგრძლივებს. როგორც ჩანს, ახალი სპორტული პროექტის მიხედვით შემადგენლობაში მის გვერდით გრიზმანის ადგილი არ არის. 

პარალელურად Foot Mercato იმ კლუბს ასახელებს, რომელში გადასვლაც 30 წლის თავდამსხმელისთვის ყველაზე რეალურია: ეს “მანჩესტერ სიტია”. ანტუანს პეპ გვარდიოლა დაუკავშირდა, რომლის მთავარი სატრანსფერო სამიზნე ჰარი კეინია, თუმცა თუ მისი დამატება ვერ მოხერხდება, “ბარსელონას” ყოფილი დამრიგებელი კლუბში სწორედ ფრანგის მიყვანას ეცდება. 

გრიზმანი “ბარსას” 2019 წელს მადრიდის “ატლეტიკოდან” შეუერთდა. დღემდე მის ანგარიშზე 99 მატჩი და 35 გოლია.