ოფიციალურად: ესპანეთის თასის ფინალის მსაჯი ცნობილია

ახლახანს ოფიციალურად ცნობილი გახდა ესპანეთის თასის ფინალის მსაჯის ვინაობა.

ესპანეთის ფეხბურთის ფედერაციის გადაწყვეტილებით, კოპა დელ რეის ფინალს, რომელშიც ერთმანეთს “ბარსელონა” და “ბილბაო” დაუპირისპირდებიან, 38 წლის არბიტრი ხუან მარტინეს მუნუერა გაუძღვება.

მუნუერას დახმარებას დიეგო ბარბერო და რაულ კაბანიერო მარტინესი გაუწევენ, მეოთხე აბიტრის როლს კი გილერმო კუადრა ფერნანდესი შეასრულებს. VAR-ის ოთახიდან ხოსე ლუის გონსალეს გონსალესი იმსაჯებს, მას კი დახმარებას ინგასიო იგლესიას ვილიანუევა გაუწევს.

მუნუერას “ბარსელონას” 26 მატჩში უმსაჯია. აქედან კატალონიელებმა 18 მოიგეს (70%), 4 ფრე (15%) ითამაშე და 4 წააგეს (15%). მან “ბლაუგრანას” 56 ყვითელი ბარათი უჩვენა. ესპანელ არბიტრს “ბარსას” მხრიდან ფეხბურთელი არასდროს გაუძევებია.

“ბილბაოს” მუნუერას მსაჯობით 23-ჯერ უთამაშია. ბასკების ანგარიშზე 13 მოგება (57%), 2 ფრე (9%) და 8 წაგებაა (34%). მან “ბილბაოს” 48 ყვითელი ბარათი უჩვენა და მოთამაშე მოედნიდან ერთხელ გააძევა.

38 წლის გამოცდილ არბიტრს “ბარსასა” და “ბილბოას” დაპირისპირებაში 4-ჯერ უმსაჯია. აქედან 2 მოგება და 2 წაგება გვაქვს. ამ თამაშებში მუნუერამ კატალონიელები 16-ჯერ გააფრთხილა, ბასკები – 10-ჯერ. მას ამ მატჩებში არცერთი მოთამაშე არ გაუძევებია.

საინტერესოა, რომ მუნუერას მსაჯობით ჩატარებული “ბარსელონას” ერთ-ერთი ბოლო შეხვედრა, რომელშიც მან თავი დაგვამახსოვრა, გასული წლის 24 ოქტომბერს გამართული “ელ კლასიკოა”. ამ მატჩში ესპანელმა არბიტრმა მადრიდელთა სასარგებლოდ ერთ-ერთ ეპიზოდში ძალიან საკამთო თერთმეტმეტრიანი დანიშნა, რაც, შესაძლოა, თამაშში გარადმტეხიც კი იყო.

ესპანეთის თასის ფინალი შაბათს თბილისის დროით 23 საათსა და 30 წუთზე გაიმართება.