Barcagate ანუ დაუჯერებელი ამბავი

2013 წელს, როდესაც “ბარსელონაში” ნეიმარის მოსვლით ახალი ერა უნდა დაწყებულიყო, ყველაფერი ისე იდეალურად არ წარიმართა, როგორც ნებისმიერ “ბლაუგრანელს” წარმოედგინა. კლუბის ხელმძღვანელობა შარში გაეხვა და 2014-ის გარიჟრაჟზე “ბარსელონა” პრეზიდენტის გარეშე დარჩა.

საპრეზიდენტო სკამი სანდრო როსელმა დატოვა. დევიდ რასელის მსგავსი აფიორის შეთხზვა როსელსაც რომ სცოდნოდა, შესაძლოა, საპყრობილის შიგნიდან დათვალიერებაც თავიდან აერიდებინა. თუმცა, ტრანსფერიდან აღებული ქრთამი მალე გამოაშკარავდა და სანდროც არა მარტო საპრეზიდენტო სკამს, არამედ თავისუფლებასაც დროებით დაეშვიდობა. ეს ცალკე ისტორიაა, ჩავლილია და ალბათ ნაპატიებიც, მთავარი კი ის მოვლენათა ისტორიული ქრონომეტრაჟია, რომელიც 2014 წლიდან “ბლაუგრანას” თავს დატრიალდა. 

ახალ პრეზიდენტად კლუბს ჟოზეპ მარია ბართომეუ მოევლინა, რომელიც როსელის გადადგომის შემდეგ ჯერ დროებით ფლობდა კლუბის მართვის სადავეებს, 2015 წლიდან კი არჩევნების გზით ოფიციალურად, პრეზიდენტადაც მოგვევლინა.

კლუბის ისტორიაში მე-40 პრეზიდენტად ბართომეუს არჩევა იმ წელს შესაძლო 6 ტიტულიდან 5-ის მოპოვებამ განაპირობა. მიუხედავად იმისა, რომ მაშინ ლეო ჟოანის მხარეს იყო, ჟოზეპმა ლაპორტა მაინც დაამარცხა. მესი საჯარო განცხადებებისგან თავს იკავებდა და საკუთარი პოზიციის დაფიქსირებასაც მაქსიმალურად ერიდებოდა.

1974 წელს აშშ-ში Watergate-ის სკანდალი გამოაშკარავდა, შელახული იმიჯისა და მძიმე ბრალდებების გამო, რიჩარდ ნიქსონი პრეზიდენტის სავარძელს გამოემშვიდობა. 43 წლის შემდეგ კი “Gate-ის” კიდევ ერთ სიქველს, კატალონიურ Barcagate-ს, ჩაეყარა საფუძველი.

მთავარი მიზეზი ძალაუფლების დაკარგვის გამო მოგვრილი შიში იყო.

როგორ დაიწყო ყველაფერი?

ყველაფერი 2017 წელს დაიწყო. მაშინ “ბარსელონას” ფანების ნაწილმა კატალონიური კლუბის მხრიდან სოციალური მედიის მონიტორინგის გამო ერთ-ერთი კომპანიის დაფინანსებაზე უკმაყოფილება გამოთქვა. ეს კომპანია I3 Ventures-ის სახელით გახლდათ ცნობილი. საპრეზიდენტო სკამმორყეული ბართომეუ ძალაუფლების მოპოვებას ძალიან პრიმიტიული და რაც ყველაზე სავალალოა, არაკანონიერი გზით ცდილობდა. 

ჟოზეპის დადებით კონტექსტში მოხსენიება, მისი ფოტოების გაპიარება და ამასთანავე “ბარსელონას” მოწინავე ფეხბურთელებისთვის იმიჯის შელახვა, I3 Ventures-ს მოქმედების მექანიზმი იყო. 

ფართო საზოგადოებისთვის ამგვარი მავნებლობა სააშკარაოზე 2020 წლის თებერვალში გამოვიდა. Cadena SER პირველი გამოცემა იყო, რომელმაც ხელმძღვანელობის მიერ 2017 წლის მიწურულს დაქირავებული I3 Ventures-ის საქმეზე ყველას ღიად აცნობა.  

რა არის I3 Ventures?

I3 Ventures-ს არის კომპანია, რომელიც მონაცემთა ბაზაზე დაყრდნობით, მომხმარებელთა ქმედებას და მათ ქცევას იკვლევს. 

ამ კომპანიას სათავეში არგენტინელი ბიზნესმენი კარლოს იბანიესი უდგას. I3 Ventures-ის წარმომადგენლების თქმით, კომპანიის მიზანია ბაზრის მსყიდველობითი უნარის გაზრდა და არსებულ მომხმარებელთა მოზიდვაზე ზრუნვა. 

რამდენად ემსახურებოდა I3 Ventures წარსულში მარკეტინგულ მიზნებს ეს ცალკე საკითხია, თუმცა კომპანიის მიერ ფეხბურთელების მიმართ განხორციელებულ ანტი-კამპანიაზე ჟერარ პიკემ თავის ინტერვიუში გასული წლის ოქტომბერში ისაუბრა:

მთავარი დამნაშავე და მისი ამფსონები

იმ აბსურდის თეატრის მთავარი შემოქმედი, არ გაგიკვირდებათ, თუ გეტყვით, რომ ბართომეუ იყო. მიუხედავად მრავალი კომპრომატისა, რომელთა გამოც პოლიციისა და გამომძიებელთა ჩართვა გახდა საჭირო, ჯერ კიდევ პრეზიდნეტობის პერიოდში, ჟოზეპი უცოდველის როლს თამაშობდა და ინტერვიუშიც “პილატეს” პოზიციას ინარჩუნებდა:

თეთრი ძაფით შეკერილი საქმის შემოქმედს თანაგუნდელები სჭირდებოდა და მათი ძებნაც არ გასჭირვებია. კლუბის აღმასრულებელი დირექტორი ოსკარ გრაუ, იურისტი ხაუმე მასფერერი და რომან გომეს პონტი პრეზიდენტთან ერთად ამ შავ-ბნელ საქმიანობაში იყვნენ გარეულნი. უფრო დეტალურად სწორედ Cadena SER-მა განმარტა, რომ უშუალო გარიგებებში ხაუმე მოსფერერი დომინირებდა, ამის სრული უფლება კი სწორედ ბართომეუსაგან ეძლეოდა.

ავანსცენაზე – გამომძიებლები!

საწყის ეტაპზე გამოძიებამ დაადგინა, რომ I3 Ventures-თან “ბარსას” რეალურთან შედარებით, გაცილებით დიდი თანხა ჰქონდა გადახდილი. უფრო კონკრეტულად, ეს რიცხვი ადეკვატურ ღირებულებას 6-ჯერ აღემატებოდა. 

კლუბის ოფიციალური განცხადებაც სწორედ სოციალური მედიისთვის არამიზნობრივად გასხვისებულ ფინანსებზე იყო დაფუძნებული.

უშუალო დეტალების დასადგენად პოლიციამ 10-მდე ლოკაცია გაჩხრიკა. ჩხრეკა ჩატარდა ჟოზეპ მარია ბართომეუსა და ხაუმე მასფერერის ბინებში, ასევე იმ კომპანიების ოფისებში, რომლებთან უკანონო გარიგებაშიც ბართომეუს მმართველობა იყო შემჩნეული. 

“ბარსას” თავს მომხდარი ასეთი სკანდალი კლუბის რეპუტაციაზე რამდენად მძიმედ მოქმედებს, ეს თავადაც მოგეხსენებათ. ზედიზედ ბოლო 2 პრეზიდენტის საკანს მიღმა აღმოჩენა ერთი შეხედვით ძალიან უსიამოვნო სურათს გვიხატავს. თუმცა, კანონი ყველასთვის თანასწორია. როდესაც ძალაუფლების ბოროტად გამოყენების ფაქტი ასეთი შესამჩნევია, რა თქმა უნდა, იქ სამართლის აღსრულებაც აუცილებელია.

პირადად მე, აქ მთავარ დანაშაულად უპირველესად კლუბის მიმართ ზიზღი მესახება. დიახ, ზიზღი. სხვა გრძნობა შეუძლებელია გამოძრავებდეს, მაშინ როდესაც ფერარის იბარებ და ბოლოს გულშემატკივარს ჯართს უტოვებ, ცდილობ, სხვების თვალის ასახვევად გაუმართლებელი ტრანსფერების გაჩარხვას, რომლის იმედი, შესაძლოა, თავადაც არ გაქვს, უნიშნავ ფეხბურთელებს გადამეტებულ ხელფასებს, ლანძღავ ყველა დროის საუკეთესო ფეხბურთელს და ბოლოს გუნდი მილიარდიანი ზარალისკენ მიგყავს.

ეს საქმე Barcagate-ად უნდა იწოდებოდეს, თუ Bartogate-ად, ცალკე განსახილველია. უგუნურმა ბართომეუმ ვერც სხვის და ვერც თავის შეცდომებზე ისწავლა, არადა როსელი თავად არ შეცვალა? მოკლე მეხსიერებასაც ვერ დავაბრალებთ მის ფარისევლობას.

7 მარტს არჩეულ პრეზიდენტს ორმაგად მეტი სამხილი ექნება პრეზიდენტის პოსტზე მყოფი პირების შეცდომების გასაანალიზებლად. შეიძლება, ამან ახლადარჩეული დამატებითი წნეხის ქვეშ მოაქციოს, თუმცა არის ერთი გრძნობა, რომელიც ყველანაირ ზეწოლას აკომპენსირებს, ეს კლუბის სიყვარულია და ეს გრძნობა Barcagate-ს შემოქმედს ნამდვილად არ გააჩნდა.