“ბარსას” ბიუჯეტი მალე 7 მილიონით შეივსება

გასული წლის სექტემბერში “ბარსელონამ” ახალგაზრდა ფეხბურთელები, მონჩუ და სერხიო აკიემე “ჟირონასა” და “ალმერიაში” იჯარით გაუშვა. მაშინ ამ ტრანსფერებისთვის დიდი ყურადღება არ მიგვიქცევია, დღეს კი, დიდი ალბათობით, ამ ფეხბურთელებისგან “ბარსა” არცთუ მცირე ფინანსურ სარგებელს ნახავს.

ორივე ფეხბურთელის შემთხვევაში კლუბებს შორის გაფორმდა ასეთი შეთანხმება – თუ მოთამაშე სეზონის განმავლობაში მონაწილეობას 22 შეხვედრაში მიიღებდა, კლუბს (“ჟირონა” ან “ალმერია”) მისი 3.5 მილიონ ევროდ გამოსყიდვის ვალდებულება წარმოექმნებოდა.

მონჩუმ “ჟირონაში” უკვე 21 შეხვედრა ჩაატარა, აკიემემ კი “ალმერიას” მაისურით 17-ჯერ ითამაშა. თუ რაიმე გაუთვალისწინებელი არ მოხდა, ორივე მათგანი 22 თამაშიან ნიშნულს უახლოეს მომავალში მიაღწევს და “ბარსელონას” ბიუჯეტიც 7 მილიონი ევროთი შეივსება.

რატომ არის მნიშვნელოვანი მსოფლიოში ყველაზე მაღალშემოსავლიანი კლუბისთვის “სულ რაღაც” 7 მილიონი? შეგახსენებთ, რომ ამჟამად “ბარსელონა” საკუთარ თავს იმის უფლებას ვერ აძლევს, რომ დაახლოებით ამ თანხად ერიკ გარსია ან მემფის დეპაი დაიმატოს.