ზედიზედ 8 მატჩი გასვლაზე – “ბარსას” 2021 წელს “კამპ ნოუზე” არ უთამაშია

სადაცაა იანვარი გავა, “ბარსელონას” კი 2021 წელს “კამპ ნოუზე” ჯერ კიდევ არ უთამაშია. რონალდ კუმანის გუნდი სახლში 31 იანვრამდე არც ითამაშებს.

“ბლაუგრანას”, ამჟამად, გასვლაზე ზედიზედ 8 თამაშის ჩატარება მოუწევს, რაც ერთგვარი ახალი რეკორდიცაა. კატალონიელები სტუმრად უკვე დაუპირისპირდნენ “უესკას” (ლა ლიგა), “ბილბაოს” (ლა ლიგა), “გრანადას” (ლა ლიგა), “სოსიედადს” (ესპანეთის სუპერ თასის 1/2-ფინალი, კორდობა), “ბილბაოსა” (ესპანეთის სუპერ თასის ფინალი, სევილია) და “კორნელიას” (ესპანეთის თასი). “ბარსა” კიდევ 2 გასვლით შეხვედრას გამართავს “ელჩესთან” (ლა ლიგა) და “რაიო ვალიეკანოსთან” (ესპანეთის თასი). გამოდის, რომ “ლურჯ-ბროწეულისფერებს” მშობლიურ სტადიონზე ფეხი ზედიზედ 6 თამაშია არ დაუდგამთ და ამას ვერც მომდევნო 2 მატჩში გააკეთებენ.

როგორც უკვე მოგახსენეთ, 8-მატჩიანი გასვლა “ბლაუგრანას” ახალი რეკორდია. “ბარსელონას” ისტორიაში აქამდე სტუმრად ზედიზედ მაქსიმუმ 4 თამაში გაუმართავს. ასეთი რამ მხოლოდ 2-ჯერ მოხდა – პირველად 2014 წელს, მეორედ კი 2019 წელს:

2014 წელი

• 11 იანვარი: ატლეტიკო-ბარსელონა 0-0 (ლა ლიგა)
• 16 იანვარი: ხეტაფე-ბარსელონა 0-2 (ესპანეთის თასი)
• 19 აინვარი: ლევანტე-ბარსელონა 1-1 (ლა ლიგა)
• 22 იანვარი: ლევანტე-ბარსელონა 1-4 (ესპანეთის თასი)

2019 წელი

• 19 თებერვალი: ლიონი-ბარსელონა 0-0 (ჩემპიონთა ლგა)
• 23 თებერვალი: სევილია-ბარსელონა 2-4 (ლა ლიგა)
• 27 თებერვალი: რეალი-ბარსელონა 0-3 (ესპანეთის თასი)
• 2 მარტი: რეალი-ბარსელონა 0-1 (ლა ლიგა)