რამდენად მომგებიანია მემფის დეპაის იანვარში შეძენა? | დადებითი და უარყოფითი მხარეები

რამდენიმე საინფორმაციო წყაროს, მათ შორის Mundo Deportivo-ს ინფორმაციით, “ბარსა” მემფის დეაპის შეძენას იანვარში შეეცდება. ჩვენ ამ შესაძლო ტრანსფერის დადებით და უარყოფით მხარეებს განვიხილავთ.

დადებითი მხარეები

1. გოლეადორის საჭიროება

ანსუ ფატიმ ოპერაცია ჩაიტარა და ის 4 თვეს გამოტოვებს. 18 წლის ფეხბურთელი მიმდინარე სეზონში გუნდის ბომბარდირია. ფატის მსგავსად, მემფის დეპაისაც 5 გოლი აქვს გატანილი და როგორც ბოლო შეხვედრებმა აჩვენა, “ბარსას” ისეთი ფეხბურთელი სჭირდება, რომელსაც საგოლე შანსების გამოყენება შეუძლია.

2. უნივერსალურობა

ნიდერლანდელს ცენტრალური თავდამსხმელის გარდა, თამაში ასევე შემტევ ნახევარმცველად, და ორივე ფლანგის გარემარბად შეუძლია. იმ შემთხვევაში, თუ “ბლაუგრანა” ზაფხულში დეპაის გარდა სხვა “ცხრიანის” ყიდვას გადაწყვეტს, მემფისისთვის პოზიციის შეცვლა პრობლემა არ იქნება.

უარყოფითი მხარეები

1. “ბლაუგრანას” სათამაშო ფილოსოფიისგან განსხვავებული სტილი

ამჟამად “ბარსას” ჭეშმარიტი “ცხრიანი” სჭირდება. 26 წლის ფეხბურთელი კი თამაშის სტილით უფრო მეტად ანტუან გრიზმანს ჰგავს და არა ლუის სუარესს, რომლის ჩანაცვლებაც კლუბისათვის მთავარი მიზანია.

2. ზაფხულში ის თავისუფალი აგენტი გახდება

მემფის დეპაი იმდენად დიდი ფეხბურთელი არ არის, რომ მისმა დამატებამ “ბარსას” საჩემპიონთალიგო შანსები გაუზარდოს. იგი უფრო მეტად სეზონის გამოსწორებისა და გადარჩენისთვის არის საჭირო. ამ ფაქტორების გათვალისწინებით რამდენად ადეკვატურად შეგვიძლია მივიჩნიოთ მის ნაცვლად იანვარში თანხის გადახდა, მაშინ როდესაც ზაფხულში თავისუფალი აგენტი ისედაც ხდება.