ხავიერ მასკერანომ კარიერა დაასრულა

“ბარსელონას” არგენტინელმა ლეგენდამ, ხავიერ მასკერანომ საფეხბურთო კარიერა დაასრულა.

მასკერანო “ბარსას” ისტორიაში ერთ-ერთი გამორჩეული ფეხბურთელია. ის “ბლაუგრანაში” 2010 წელს, “ლივერპულიდან” გადმოვიდა და თავიდან გუნდში მნიშვნელოვანი როლი ნამდვილად არ ჰქონდა. თუმცა, მას შემდეგ, რაც პეპ გვარდიოლამ არგენტინენელს ადგილი დაცვის ცენტრში მიუჩინა, ის “ბარსელონას” ერთ-ერთი მნიშვნელოვანი წევრი გახდა. მასკერანოს არასდროს აკლდა ის, რაც ბოლოდროინდელ “ბარსელონაში” დიდი პრობლემაა – მოტივაცია, თავდადება, კონცენტრირება.

ხავიერ მასკერანომ კატალონიაში 2018 წლის იანვრამდე თამაშობდა, რის შემდეგაც ჩინურ “ჰებე ჩაინა ფორჩუნს”, 2019 წელს კი “ესტუდიანტესს” მიაშურა. სწორედ არგენტინულ გუნდში დაასრულა ლეგენდამ კარიერა.

მასკეს “ბარსელონაში” 334 თამაში და 1 გოლი, ხოლო არგენტინის ნაკრებში 147 თამაში და 3 გოლი დაუგროვდა.

კარიერაში მოგებული 23 ტიტულიდან 19 “ბარსელონაზე” მოდის. ხავიერს 2-ჯერ აქვს მოგებული ზაფხულის ოლიმპიური თამაშები. ის ამ შედეგის მქონე ერთადერთი ცოცხალი ფეხბურთელი და ისტორიაში მე-2 არგენტინელი სპორტსმენია.