მძვინვარე ხარი!

ხარი (El Toro) – ასე ეძახიან ლაუტარო მარტინესს, მისი ფიზიკური მონაცემების და მებრძოლი ხასიათის გამო. ლაუტარო ისევეა მეტოქის კარზე დაგეშილი, როგორც ხარი, წითელ ნაჭერზე – წერს Mundo Deportivo.

“ბარსამ” რამდენიმე თვის წინ გადაწყვიტა ლაუტაროს გაფორმება და შეძლებს თუ ვერა ამას, სულ მცირე ხანში შევიტყობთ, გადაწყვეტილება კი მისი სათამაშო სტილის და მესის გამო მიიღეს. ყველა აღნიშნავს, რომ ლაუტარო ძალიან ჰგავს ლუის სუარესს, კლასიკური ცხრა ნომერია და ეროვნულ ნაკრებში, იდეალურად უგებს თავის კაპიტანს. თითქოს აგუეროსაც წააგავს სათამაშო სტილით, მაგრამ მაინც დიდი სხვაობაა, აგუეროს იმ სივრცის ათვისება უყვარს, სადაც მესი მოქმედებს, ლაუტარო კი ძირითადად საჯარიმოში ტრიალებს.

კარგი შთაბეჭდილება დატოვა “ბარსელონასთან” დაპირისპირებაში, “კამპ ნოუზე”, სადაც გოლიც გაიტანა და კიდევ რამდენიმე მომენტი შექმნა. სერია ა-ში 11 გოლი აქვს გატანილი, 8 მარჯვენა ფეხით და სამი თავით. მიუხედავად იმისა, რომ დიდი სიმაღლით არ გამოირჩევა, (1.74) თავით საკმაოდ კარგად თამაშობს.

ამაზე იოჰან კრუიფიც გაგვახსენდება, რომელიც მუდმივად ამბობდა, რომ თავით თამაშის დროს, უმთავრესი სწორი პოზიციის შერჩევაა და არა სიმაღლე, ან ნახტომი.

ისტორიას შემორჩა მისი სანაძლეო, მარკო ვან ბასტენთან, რომელიც თავით ძალიან კარგად თამაშობდა, 1.88 იყო სიმაღლეში და არც ნახტომი დაეწუნებოდა. კრუიფმა უთხრა, რომ მცველის როლს მოირგებდა და 10-დან 5-ს არ გაატანინებდა, ოღონდ სტატიკურ მდგომარეობაში უნდა ებროლათ ბურთისთვის, მხოლოდ ორი ნაბიჯის რადიუსზე. მარკომ თქვა, რომ მინიმუმ 7-ს გაიტანდა. მიუხედავად იმისა, რომ კრუიფზე ბევრად მაღალი იყო, უფრო კარგი ნახტომიც ჰქონდა, გაცილებით ახალგაზრდაც იყო და მსოფლიოს საუკეთესო ფეხბურთელად ითვლებოდა (არა მხოლოდ, თავით თამაშის გამო), 10-დან მხოლოდ 3-ის გატანა შეძლო. ასე დაარწმუნა კრუიფმა, ახალგაზრდა მარკო ვან ბასტენი, რომ მთავარი მოძრაობა და ბურთის ტრაექტორიის განსაზღვრაა. მერე კი დააყოლა, ამ კომპონენტში საუკეთესო, უგო სანჩესიაო (1.75), სულ რაღაც ერთი სანტიმეტრით მაღალი, ლაუტარო მარტინესზე. სათამაშო სტილითაც მაგრად ჰგავდა და თუ მის დონეზე ითამაშა, “ბარსას” გოლების პრობლემა არასდროს ექნება.

ნებისმიერ შემთხვევაში, სუარესთან კონკურენცია მოუწევს. რა თქმა უნდა, იქნება შეხვედრები სადაც ორივე ერთად იქნება მოედანზე, მაგრამ ძირითადად მაინც, კონკურენტებად განიხილებიან და დღესდღეობით, ლუის სუარესი, მასზე უკეთესია. როგორც მინიმუმ, ერთი სეზონის განმავლობაში, ლაუტაროს მოუწევს სუარესისგან სწავლა და იმის დამტკიცება, რომ მის დონეზე თამაში შეუძლია. ეს ერთგვარი რისკია, “ბარსას” მხრიდან, მაგრამ მათ სწორედ ლაუტაროს ხასიათის ეიმედებათ, რომელიც ბრძოლისუნარიანობით და ძლიერი მენტალობით გამოირჩევა, ამ კონკურენციაში კი, ყველანაირად გაიზრდება.

მოგებულ ორთაბრძოლებში, მხოლოდ ედინ ჯეკოს ჩამორჩება (სიმაღლე – 1.93), ჯეკოს სარეკორდო, 251 ორთაბრძოლა, ანუ ე.წ. “პირველი ბურთი” აქვს მოგებული.

• ლაუტარო მარტინესს, 107 მოგებული ორთაბრძოლა აქვს.
• კრიშტიანუ რონალდუ – 103.
• იმობილე – 94.
• ლუკაკუ – 87.
• იგუაინი – 76.
• დიბალა – 70.

ლაუტაროს წინააღმდეგ, თამაშის წესები 50-ჯერ დაარღვიეს, რაც ასევე ერთ-ერთი პირველი მაჩვენებელია და აღნიშნავს, რომ მისი შეჩერება, თამაშის წესების დარღვევის გარეშე, ძალიან რთულია.

“იუვენტუსის” ფორვარდებს და თავის მეწყვილეს, რომელუ ლუკაკუს, დაფარულ კილომეტრებშიც აღემატება, ლაუტარო საშუალოდ 9.69 კილომეტრს ფარავს, მიუხევადა იმისა, რომ ცხრიანის პოზიციაზე თამაშობს და წესით და რიგით, დიდი არეალი არ უნდა ჰქონდეს გადაადგილებისთვის, მაგრამ ყველა თამაშში აჩვენებს, რომ ძალიან მოძრავი ფორვარდია და მცველებს საშინლად უჭირთ, მასთან გამკლავება.

შეუიარაღებელი თვალითაც ჩანს, რომ ლაუტარო მარტინესის მოქმედება, ბურთით თუ უბურთოდ, საშინელ წნეხში აქცევს მცველებს და თუ მან, ლუის სუარესის, ან გრიზმანის სათამაშო სტილთან ადაპტირება შეძლო, მეტოქე გუნდის მცველებს, კარგი არაფერი ელით.