“ბარსელონადან” განათხოვრებული ფეხბურთელების მორიგი მარცხი “შალკეში”

ჟან-კლერ ტოდიბომ, რომელიც “ბარსელონას” საკუთრებაშია და იჯარით გელზენკირხენის “შალკეში” თამაშობს, ბუნდესლიგაში მორიგი მატჩი ჩაატარა. 

“შალკემ” აუტსაიდერ “ვერდერს” უმასპინძლა და 0-1 დამარცხდა. 32-ე წუთზე გატანილი მატჩის ერთადერთი გოლი სწორედ ტოდიბოს მიერ ბურთის დაკარგვას მოჰყვა. თანაც, ამ დროს მას ყვითელი ბარათი უკვე მიღებული ჰქონდა, ამ ყველაფრის გათვალისწინებით კი მწვრთნელმა შესვენებაზე მისი შეცვლა გადაწყვიტა. 

შეხვედრაში მონაწილეობა კიდევ ერთმა “ბარსელონელმა”, ხუან მირანდამაც მიიღო. ესპანელი 2020 წელს ძირითად შემადგენლობაში პირველად მოხვდა და წაგების მიუხედავად, საკმაოდ კარგი შთაბეჭდილება დატოვა. 

“შალკე”, რომელმაც უკვე ზედიზედ 4 მატჩი წააგო, ბუნდესლიგის სატურნირო ცხრილში მე-10 პოზიციას იკავებს.