რაფა მარკესი: გალიარდოს “ბარსას” ჩასაბარებლად ყველა თვისება აქვს

ლეგენდარული მექსიკელი მცველი რაფა მარკესი მიიჩნევს, რომ “რივერ პლეიტის” დამრიგებელს, მარსელო გალიარდოს “ბარსელონაში” წარმატების მისაღწევად ყველა საჭირო თვისება აქვს.

43 წლის არგენტინელს, ბოლო დროს, “ბარსელონას” ხშირად უკავშირებენ. გაიჟღერა ინფორმაციამაც, რომ გალიარდომ, შესაძლოა, ვალვერდე უკვე დეკემბერში შეცვალოს.

“ვფიქრობ, გალიარდომ “ბარსელონას” ნდობა იმის გამო დაიმსახურა, რასაც მან “რივერ პლეიტთან” ერთად მიაღწია. ვიცი, რომ “ბარსელონაში” გადასვლა ადვილი არაა, მაგრამ მარსელოს დიდ კლუბში მუშაობისთვის საჭირო გამოცდილება და ცოდნა აქვს.” – ციტირებს “ბარსას” ყოფილი მექსიკელი მცველის სიტყვებს TNT Sports.

მარსელო გალიარდომ “რივერ პლეიტი” 2014 წლის ივნისში ჩაიბარა. გასული 5 წლის განმავლობაში, მან გუნდს 10 ტიტული მოაგებინა, მათ შორის 2-ჯერ კოპა ლიბერტადორესი, რომლის მესამედ მოგების შანსიც გალიარდოს 23 ნოემბერს, “ფლამენგოსთან” გასამართ ფინალში ექნება.

გალიარდო “რივერ პლეიტის” ისტორიაში ყველაზე ტიტულიანი მწვრთნელია.