რა უნდა იცოდეთ 2019 წლის კოპა ამერიკის შესახებ

კოპა ამერიკამდე ზუსტად ერთი თვე დარჩა: 14 ივნისიდან 7 ივლისამდე, ბრაზილიაში სამხრეთ ამერიკაში საუკეთესო ნაკრების ტიტულისთვის ბრძოლა იქნება. რა თქმა უნდა, მასში “ბარსელონას” ფეხბურთელებიც მიიღებენ მონაწილეობას. 

მონაწილე გუნდები

ტურნირში მონაწილეობას ათი ტრადიციული ქვეყანა – ბრაზილია, არგენტინა, ჩილე, კოლუმბია, ურუგვაი, პარაგვაი, პერუ, ეკვადორი, ვენესუელა და ბოლივია მიიღებს, მათთან ერთად კი მოწვეული ნაკრებები, ყატარი და იაპონია. კონმებოლი სხვა კონტინენტიდან გუნდებს 1993 წლიდან იწვევს, ხშირ შემთხვევაში, ორს. როგორც წესი, კოპა ამერიკაზე ყველაზე ხშირად მექსიკას ვხედავთ, მაგრამ ახლა ტურნირს მხოლოდ აზიელები დაემატნენ. 

ყველაზე წარმატებული ნაკრები

კოპა ამერიკას გამარჯვებული ყველაზე მეტჯერ ურუგვაის ნაკრები გახდა. მათ ანგარიშზე 15 ტიტულია. ბოლოს, “სელესტემ” ჩემპიონობა 2011 წელს იზეიმა, რაშიც დიდი როლი ლუის სუარესმა ითამაშა. 

მასპინძელი

2019 წლის კოპა ამერიკის ფინალი რიო დე ჟანეიროში, ლეგენდარულ “მარაკანაზე” გაიმართება. გახსნით მატჩს სან პაულოს “მორუმბი” უმასპინძლებს. მატჩები “კორინთიანსის” სტადიონზე, პორტო ალეგრეში (“გრემიო”), ბელო ორიზონტეში (“კრუზეირო”/”მინეირო”) და სალვადორშიც (“ბაია”) გაიმართება. 

“ბარსელონას” ფეხბურთელები

“ბარსელონადან”, ტურნირში მონაწილეობა შემდეგ 7 მოთამაშეს შეეძლება: მალკომი, ფილიპე კოუტინიო, არტური (ბრაზილია), ლიონელ მესი (არგენტინა), ლუის სუარესი (ურუგვაი), ხეისონ მურილიო (კოლუმბია), არტურო ვიდალი (ჩილე). 

ერთმანეთის წინააღმდეგ

ჯგუფურ ეტაპზე “ბარსელონას” ფეხბურთელების დაპირისპირების ორი შემთხვევა შეიძლება, იყოს. მესის და მურილიოს ერთმანეთის წინააღმდეგ არგენტინა-კოლუმბიის მატჩში ვიხილავთ, ურუგვაი-ჩილეს შეხვედრაში კი ერთმანეთის მეტოქეები ლუის სუარესი და არტურო ვიდალი იქნებიან. 

ჯგუფები

სამი ჯგუფიდან პლეი-ოფში პირველ და მეორე ადგილოსნებთან ერთად საუკეთესო შედეგის მქონე მესამე ადგილზე გასული ორი გუნდიც გავა. ამის შემდეგ, მეოთხედფინალები გაიმართება.

გახსნითი შეხვედრა ბრაზილიას და ბოლივიას შორის, საქართველოს დროით, 15 ივნისს, 03:30 საათზე დაიწყება, ფინალი კი 7 ივლისს – 23 საათზე.