ვალვერდე ტოდიბოთი მოხიბლულია

ჟან-კლერ ტოდიბო საფეხბურთო სამყაროს დიდმა ნაწილმა რამდენიმე კვირის წინ გაიცნო, როცა ახალგაზრდა ფრანგი კატალონიის “ბარსელონაში” გადავიდა. ცენტრალური მცველის ტრანსფერი “ბლაუგრანას” 1 მილიონი ევრო დაუჯდება, რაც შესაძლოა 3 ნაწილად გადანაწილდეს. მიუხედავად იმისა, რომ ტოდიბოს “ტულუზასთან” კონტრაქტი ივნისში ეწურებოდა და დაგეგმილი იყო, რომ უკანახაზელი გუნდს უფასოდ შეიცვლიდა, ესპანურმა გრანდმა ტრანსფერის დაჩქარება გადაწყვიტა.

ეს გარკვეულწილად იმან განაპირობა, რომ ფრანგულმა კლუბმა ფეხბურთელი გუნდიდან მოკვეთა და შესაძლოა ნახევარი სეზონი მას სათამაშო პრაქტიკის გარეშე გაეტარებინა.

ასე და ამგვარად, 31 იანვარს კატალონიელებმა ახალგაზრდა მცველის ტრანსფერი გააოფიციალურეს და მას 6-ნომრიანი მაისური უბოძეს. ტოდიბო კლუბის განაცხადშია ლა ლიგასა და “კოპა დელ რეიზე”, მაგრამ არა ჩემპიონთა ლიგაზე.

19 წლის მცველს ჯერ-ჯერობით ლურჯ-ბროწეულისფერი ფორმით დებიუტი არ ქონია, მეტიც, ის განაცხადშიც კი არ მოხვედრილა, მაგრამ დღეს ესპანურმა Sport-მა გაავრცელა ინფორმაცია, რომლის თანახმადაც ერნესტო ვალვერდე სავარჯიშო სესიებზე კლუბის ახალწვეულის თამაშით კმაყოფილია.

ფეხბურთელი, რომელიც სხვა ჩემპიონატიდან და სხვა კლუბიდან მოდის, კატალონიელთა დინამიკაში კარგად ჯდება და ამა თუ იმ საკითხს საკმაოდ

მარტივად, ზედმეტი ახსნა-განმარტებების გარეშე იგებს. ასე რომ, გუნდის თავკაცმა მასში ტალანტი უკვე დაინახა და შესაძლოა რამდენიმე დღეში ტოდიბოს დებიუტიც ვიხილოთ.

მისი ტრანსფერის იდეა ის იყო, რომ ნახევარი სეზონის განმავლობაში პირველ გუნდთან ერთად ივარჯიშებდა, რაც ადაპტაციასაც გაუმარტივებდა. მაგრამ ტოდიბოს მიერ ვარჯიშებზე ნაჩვენებმა მაღალმა დონემ ვალვერდეს გეგმები შეაცვლევინა. მეტიც, სავარაუდოა, რომ თანდათან, უმტიტის ტრავმის პერიოდში კლუბისთვის მეოთხე მცველი სწორედ ტოდიბო გახდება და არა “ვალენსიადან” იჯარით მოსული მურილიო.